Ինչպե՞ս է Ալեքսանյանը «Այո» քարոզել

Սամվել Լիմինդրովիչ Ալեքսանյանն այսօր ԱԺ-ի միջանցքում, պատասխանելով լրագրողների հարցերին, նախ ասել է, թե ինքն անձամբ մասնակցել է «Այո»-ի քարոզչությանը «Մալաթիա-Սեբաստիա» համայնքում, որից հետո էլ պատասխանելով լրագրողի հարցին, թե տեսնում է՞ արդյոք իրեն հաջորդ խորհրդարանում՝ ասել, թե դա արդեն ժողովուրդը կորոշի, եթե ժողովուրդն իրեն ընտրի՝ ինքը կլինի ԱԺ-ում:

Փաստորեն, ի՞նչ է ստացվում՝ մարդը «Այո» է քարոզել, համայնքի բնակիչներին իբրև թե բացատրել է, թե ինչ է ներկայացնում նոր Սահմանադրությունը, ինչ դրական կողմեր ունի, և այդքանով հանդերձ այդ նույն մարդը չգիտի մի պարզ բան, որ նոր Սահմանադրությամբ մեծամասնական ընտրակարգ այլևս չի լինելու, հետևաբար ժողովուրդը չի կարող որոշել կամ ընտրել, թե ինքը՝ Սամվել Լիմինդրովիչը կլինի՞ հաջորդ խորհրդարանում, թե՞ ոչ: Ժողովուրդը կարող է ընտրել ընդամենը կուսակցությանը, իսկ ովքեր կընդգրկվեն կուսակցության համամասնական ցուցակում, դա արդեն կորոշի կուսակցության ղեկավարությունը, այլ ոչ թե ժողովուրդը: Ընդ որում, մեծամասնական ընտրակարգի վերացումը նոր Սահմանադրության ամենաուշագրավ կետերից է, որը դժվարություններ կստեղծի օլիգարխների համար՝ խորհրդարանում հայտնվելու հարցում: Հարց է առաջանում, թե նույնիսկ այս հասարակ բանը չիմանալով՝ ինչպե՞ս է Ալեքսանյանը «Այո» քարոզել:

Կարեն Վարդանյան