Շարմազանովը՝ «Նոր Հայաստանի»-ի ցույցերի մասին

Ազգային ժողովի փոխնախագահ Էդուարդ Շարմազանովը չի հետևում «Նոր Հայաստան» նախաձեռնության ցույցերին և չի ցանկանում մեկնաբանություններ տալ: Ազգային ժողովում Շարմազանովը նշեց, որ այնքան պարապ չէ, որ նստի «Նոր Հայաստան»-ի ցույցերին հետևի: «Հետո էլ ինչ ցույց: Այստեղ ավելի շատ մարդ ենք կանգնած, քան նրանց միտինգներին»,- նշեց Շարմազանովը:

Հարցին, թե իշխանություններն այդ ցույցերից վտանգ չե՞ն տեսնում, ԱԺ փոխնախագահը պատասխանեց. «Խոսքn ուժ է, որը սպառվելու հատկություն ունի: Եթե դու ամեն օր նույն բանը կրկնում ես, ամեն օր մի քանի անգամ, արդեն անհետաքրքիր է դառնում: Հիմա ես էլ, եթե ամեն օր նույն բանն ասեմ, անհետաքրքիր կլինի: Մեր կարծիքն ասել ենք արդեն: Մենք մեր կարծիքը չենք փոխել ոչ Րաֆֆի Հովհաննիսյանի գործունեության, ոչ ՀԱԿ-ի գործունեության, ոչ ՀՀԿ-ի, ոչ էլ մեկ այլ ուժի գործունեության վերաբերյալ»:

Դիտարկմանը, թե Զարուհի Փոստանջյանը Սյունիքի մարզում հայտարարել է, որ Սուրիկ Խաչատրյանին պետք է արտաքսել Սյունիքի մարզից, Շարմազանովն ասաց. «Հիմա մարդ է, իր կարծիքն ասել է, ես ինչ ասեմ: Թեթև տարեք, սա քաղաքականություն է, որտեղ պետք է լինի քննադատություն, պետք է լինի շոուի էլեմենտ, տեսախցիկների առկայության դեպքում մարդիկ իրենց լրիվ այլ ձև են պահում: Եթե դու գործ ունես ընտրողի, հանրության հետ, դու չես կարող նման բաներ չանել, մանավանդ հետընտրական փուլում: Մինչև 2017թ. բոլորը լավ իմաստով խնդիր ունեն կենդանի մնալ: Սա իշխանություններին չի վերաբերում, որովհետև իշխանությունը ստացել է ժողովրդի վստահությունը, ինչը վերահաստատվեց նաև հանրաքվեի արդյունքներով: Իսկ ընդդիմությունը նման խնդիր ունի: Ես էլի եմ ասել, որ մինչև 2017թ.-ն ավելի սուր պայքար է լինելու ընդդիմադիր դաշտում ավելի լուրջ դերակատարում ստանձնելու համար: Մենք տեսնում ենք, որ նոր կուսակցություններ են ձևավորում, որոնք նոր որակ են փորձում հաղորդել: Ես ողջունում եմ դա: Այն, ինչը բնական է, պետք է ողջունես»:

Նա հավելեց,որ հանրությունը հոգնել է ռադիկալ, մարգինալացված ատելության կոչերից: «Մենք անցել ենք այդ փուլը: Մարդ պետք է մի փոքր գրագիտություն ունենա, պետք է կարդա: Այն, ինչ մենք արել ենք 10 տարի առաջ, 5 տարի առաջ, հիմա չենք կարող անել: Աշխարհը փոխվել է, Հայաստանն էլ է փոխվել: Չի կարելի ամեն օր մարդկանց տանել հրապարակ, տանել տուն, հետո կրկին տանել հրապարակ, նույն երգը երգել, հեքիաթ պատմել, ուղարկել տուն: Եթե դու ծրագիր չունես, մարդկանց ինչո՞ւ ես տանում հրապարակ: Մարդկանց հարկավոր է հրապարակ տանել միայն մեկ անգամ, երբ դու կամ հաղթում ես կամ պարտվում»,- ասաց նա:

Դիտարկմանը, թե Նիկոլ Փաշինյանն էլ է նույն բանն ասում, Շարմազանովն ասաց. «Այո, ճիշտ է ասում: Նիկոլ Փաշինյանը շատ ճիշտ բան է ասում, որ ընդդիմությունը պետք է լինի ինստիտուցիոնալ: Քանի դեռ ընդդիմությունը ՏԻՄ ընտրություններին չի մասնակցում, քանի դեռ ընդդիմությունը իր կառույցները չի ստեղծում և ամրապնդում տարածքներում, քանի դեռ առանց տեսախցիկների չի գնում և գյուղացիների հետ հանդիպում, ունենք այն, ինչ ունենք: Երբ ընդդիմությունը մասնակցում է միայն համապետական ընտրություններին, այն էլ միայն հաղթանակի ակնկալիքով, դա նույնն է, որ «Դեբետ Ալավերդի» ֆուտբոլային ակումբը խաղաղ Բրազիլիայի հավաքականի հետ, պարտվի, հետո հայտարարի, թե մրցավարը ծախված էր: Այդպես չի լինում, դու պետք է թիմ ունենաս»: