Deep Purple խումբն ընդգրկվել է ռոք-ն-ռոլի ամերիկյան Փառքի սրահում

Լեգենդար Deep Purple բրիտանական խումբը ներառվել է ռոք-ն-ռոլի Փառքի սրահում, որը գտնվում է ԱՄՆ-ի Քլիվլենդ քաղաքում (Օհայոյի նահանգ): Այդ մասին, ինչպես տեղեկացնում է «Արմենպրես»-ը, դեկտեմբերի 17-ին հաղորդվում է կազմակերպության պաշտոնական կայքում:

Արարողությունը, որի ընթացքում Deep Purple-ը, Chicago ամերիկյան ռոք խումբը, բլյուզ-ռոք-կիթառահար Սթիվ Միլլերը և մի շարք այլ կատարողներ պաշտոնապես կմտնեն ռոք-ն-ռոլի էլիտար հանրակցություն, կկայանա Նյու Յորքում 2016 թվականի ապրիլին:

Կանոններին համապատասխան, կատարողին կամ խմբին Փառքի սրահում ներառելու համար անհրաժեշտ է, որ նրանց առաջին ձայնագրության թողարկման պահից անցնի առնվազն 25 տարի: Այդ հանրակցության առաջին նիստը կայացել է 1986 թվականին, երբ դրանում ընդունվեցին միանգամից 10 երաժիշտներ, այդ թվում՝ Չաք Բերին, Ջեյմս Բրաունը, Ռեյ Չառլզը, Բադի Հոլլին և Էլվիս Փրեսլին: Ավելի ուշ ի թիվս ուրիշների այդ պատվին արժանացան The Beatles-ը, Բոբ Դիլանը, Բի Բի Քինգը և The Rolling Stones-ը:

Deep Purple խումբը ձևավորվել է 1968 թվականին: Նրա սկզբնական կազմում էին Ռոդ Էվանսը, Ռիչի Բլեքմորը, Ջոն Լորդը, Իեն Փեյսը և Նիք Սիմփերը: Խմբի գոյության ավելի քան 40 տարվա ընթացքում նրա կազմը քանիցս փոխվել է. ընդհանուր առմամբ տարբեր ժամանակներում խմբի կազմում հանդես է եկել 14 մարդ: Թմբկահար Իեն Փեյսը միակ երաժիշտն է, որը միշտ եղել է Deep Purple-ի կազմում, հաղորդել է ՏԱՍՍ-ը: