Լուրջ չընդունելով՝ լացակումած նետվում են ՆԱՏՕ-ի գիրկը

ՌԴ նախագահ Վլադիմիր Պուտինի՝ իր վերջին ասուլիսի ժամանակ արած նվաստացուցիչ արտահայտությունն այն մասին, թե Թուրքիայի ղեկավարները «լիզում են ամերիկացիների որոշ տեղերը», գրավել է ողջ միջազգային հանրության ուշադրությունը: Բնական է, որ ակնկալվում էր Թուրքիայի պատասխանը, որը չուշացավ, սակայն, ինչպես և սպասվում էր՝ Թուրքիայի ղեկավարների համարձակությունը չհերիքեց իրենց ուղղված վիրավորանքին ու նվաստացմանը տալ համարժեք պատասխան, և Թուրքիայի վարչապետ Ահմեդ Դավութօղլուն բավարարվեց ընդամենը Պուտինի դիրքորոշումը «մանկական պահվածք» անվանելով, նաև ավելացնելով, որ Պուտինի հայտարարությունները լուրջ չի ընդունում:

Հետաքրքիր է, եթե Թուրքիայի ղեկավարները լուրջ չեն ընդունում ՌԴ նախագահին, ապա ինչո՞ւ ռուսական ինքնաթիռի խոցումից հետո անմիջապես լացակումած նետվեցին ՆԱՏՕ-ի գիրկը՝ այնտեղից իրենց համար պաշտպանություն և փրկություն ակնկալելով: Կամ եթե բանը հասնի իսկապես պատերազմական գործողությունների և անգամ ՆԱՏՕ-ն չկարողա իրենց փրկել Ռուսաստանի ճիրաններից, Թուրքիայի ղեկավարներն այն ժամանա՞կ էլ չպիտի լուրջ ընդունեն իրենց հասցեին արված հայտարարությունները: Երևի թե մոռացել են, որ ողջ պատմության ընթացքում բոլոր ռուս-թուրքական պատերազմներն ավարտվել են Թուրքիայի պարտությամբ:

Կարեն Վարդանյան