Մամեդյարովը դրական է գնահատել Սարգսյան-Ալիև հանդիպումը

Ադրբեջանի արտաքին գործերի նախարար Էլմար Մամեդյարովը դրական է գնահատել Շվեյցարիայի Բեռն քաղաքում Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը: Ինչպես հաղորդում է «Արմենպրես»-ը, այս մասին Մամեդյարովն ասել է ադրբեջանական AzerTac լրատվականի հետ զրույցում:

«Հայաստանի և Ադրբեջանի նախագահների՝ դեկտեմբերի 19-ին կայացած հանդիպումը պետք է դրական գնահատել: Մենք ողջունում ենք ԵԱՀԿ Մինսկի խմբի համանախագահների, ինչպես նաև Շվեյցարիայի կառավարության ներդրած ջանքերը հանդիպման կազմակերպման հարցում»,- ասել է Մամեդյարովը՝ նշելով, որ կողմերին կոչ է արվել 2016 թվականին ակտիվացնել երկխոսությունը հակամարտության կարգավորմանն ուղղված և շարունակել Սոչիի, Նյու Պորտի, Փարիզի քննարկումները:

Շվեյցարիայի Համադաշնության մայրաքաղաք Բեռնում դեկտեմբերի 19-ին կայացել են ԵԱՀԿ Մինսկի խմբի համանախագահների միջնորդությամբ Հայաստանի Հանրապետության Նախագահ Սերժ Սարգսյանի և Ադրբեջանի Հանրապետության նախագահ Իլհամ Ալիևի բանակցությունները' ուղղված ԼՂ հիմնահարցի խաղաղ կարգավորմանը: ՇՀ կառավարության «Լանդգութ Լոհն» ընդունելությունների տանը տեղի ունեցած հանդիպումը մեկնարկել է երկու երկրների արտաքին գործերի նախարարներ Էդվարդ Նալբանդյանի և Էլմար Մամեդյարովի, ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ջեյմս Ուոր լիքի (ԱՄՆ), Պիեռ Անդրիոյի (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշիկի մասնակցությամբ, որից հետո սկսվել է Հայաստանի և Ադրբեջանի նախագահների առանձնազրույցը: Բանակցությունների ժամանակ քննարկվել են հակամարտության գոտում լարվածության նվազեցմանն ուղղված քայլերը և հիմնախնդրի կարգավորման առաջմղման հնարավորությունները: