Բայց չէ՞ որ պատգամավորն իրավունք չունի բիզնեսով զբաղվելու...

ԱԺ ԲՀԿ խմբակցության պատգամավոր Գուրգեն Արսենյանը երեկ խոսելով երթևեկության կանոնների խախտումների տուգանքների կիրառման փոփոխությունների մասին՝ ասել է, թե անձամբ իր վրա այնքան ակտեր են գալիս, որ հնարավոր չէ պատկերացնել:

Պատգամավորն, իհարկե, անմիջապես պարզաբանել է, որ իր բոլոր մեքենաները (իր երեխաների քշած, իր ծառայության) իր անունով են և մեխանիկորեն բոլոր խախատումների համար ակտերը գալիս են իր անունով:

Նայելով Գուրգեն Արսենյանի ներկայացրած հայտարարագիրը՝ ամեն ինչ իր տեղն է գալիս, որովհետև պատգամավորն իսկապես մեծ ունեցվածքի տեր է՝ 2 ինքնաթիռ, 6 շենք, տարեկան 1 միլարդ 190 միլիոն դրամի չափ եկամուտ և այլն: Բացի այդ, մի շարք խոշոր ընկերություններում Գուրգեն Արսենյանը 100 կամ 50 տոկոս բաժնետեր է: Կարճ ասած՝ բավականին հաջողակ բիզնեսմեն: Ամեն ինչ իր տեղում է, միայն մի հարց է մնում՝ բայց չէ՞ որ պատգամավորն իրավունք չունի բիզնեսով զբաղվելու...

Կարեն Վարդանյան