Սերժ Սարգսյանի լավ գրված ելույթն ուշացած էր

«Իհարկե, ցանկացած երկիր ունի իր շահերը, իր առաջնայնությունները, բայց դրանք չպետք է հակադրվեն մեր ընդհանուր շահերին և փոխադարձ պարտավորություններին։ Ամեն անգամ, երբ Ադրբեջանի Զինված ուժերը Հայաստանի Հանրապետության դեմ կիրառում են ավտոմատներ, ականանետեր և հրետանային սարքավորումներ, նրանք կրակում են Աստանայի, Դուշանբեի և Բիշկեկի, Մոսկվայի և Մինսկի ուղղությամբ։ Հիշեցնեմ, որ մենք Կանոնադրության մեջ ունենք համապատասխան հոդված։ Եվ եթե մենք ոչ միայն չենք կիրառում այդ հոդվածը, չենք քննարկում ստեղծված իրավիճակը, հարկ չենք համարում վերցնել լսափողը և հետաքրքրվել՝ ինչ է կատարվում դաշնակից Հայաստանում, և դրա հետ մեկտեղ նաև քվեարկում ենք միմյանց շահերի դեմ միջազգային կազմակերպություններում, երրորդ երկրների հետ ընդունում ենք երկկողմ հայտարարություններ, որոնց տեքստն ուղղված է ՀԱՊԿ դաշնակիցների դեմ, ապա մենք պարզապես այդ կրակոցների տակ ենք դնում մեր ամբողջ Կազմակերպությունը, նրա հեղինակությունը, նրա կարևորությունը»:

ՀՀ նախագահ Սերժ Սարգսյանի այս ելույթը ՀԱՊԿ-ի շրջանակներում, «Նոր ժամանակներ» կուսակցության նախագահ Արամ Կարապետյանի խոսքով՝ բավականին հաջողված էր և լավ գրված, սակայն ինչպես նա նշեց ԼՈԻՐԵՐ.com-ի թղթակցի հետ զրույցում, այն ուշացած էր առնվազն մեկ տարով: 

Ըստ Կարապետյանի՝ ՀԱՊԿ-ը, ինչպես մինչ օրս չի միջամտել հայ-ադրբեջանական հարաբերություններին, այնպես էլ հիմա դա չի անի:

Որպես թեմայի շարունակություն՝ Կարապետյանի կարծիքը հարցրինք ՀՀ ՊՆ մամուլի քարտուղար Արծրուն Հովհաննիսյանի՝ այսօրվա արած այն հայտարարության մասին, որ հրադադար, ըստ էության, այլևս չկա, և «հրադադարի խախտում» տերմինը փոխարինել է պետք «պատերազմ» եզրույթով: 

«Ես, իհարկե, այդ հայտարարությանը համամիտ չեմ և գտնում եմ, որ մեր Պաշտպանության նախարարի մամուլի խոսնակն շտապել է՝ նման հայտարարություն անելով: «Պատերազմ» բառը պետք է ուղեկցվի ոչ միայն խոսքով, այն նաև համապատասխան գործողություններով, որոնք այսօր դեռ չեն իրականացվում հակառակորդի կողմից»,- եզրափակելով խոսքը՝ նշեց Կարապետյանը: