Վարդագույն ակնոցների սիրահարը

Ինչպես պարզվում է՝ կառավարությունն այդքան էլ անտարբեր չէ մեր ժողովրդի հետագա ճակատագրի նկատմամբ: Կասեք՝ ի՞նչն է մեզ ստիպում նման լավատեսություն ցուցաբերել: Պարզաբանենք՝ կառավարությունում քննարկված ՀՀ ժողովրդագրական իրավիճակի բարելավման 2016-2018 թվականների ազգային ծրագիրը: Բանից պարզվում է, որ բոլորիս պատկերացումները, թե Հայաստանի բնակչությունը գնալով կրճատվում է, սին են ու դատարկ: Կասեք՝ խելքներս թռցրե՞լ եք, ի՞նչ է, կպատասխանենք՝ ո՛չ մի նման բան, պարոնա՛յք, մենք առողջ ենք ու ապագայում ցնորվելու ոչ մի նպատակ չունենք: Եթե ձեր մեջ առաջացան կասկածներ՝ մեր կողմից հնչեցվածի վերաբերյալ, ապա խնդրում ենք ծանոթանալ դրա մասին կառավարության կողմից տարածած համապատասխան հաղորդագրությանը: Ինչպես պարզում ենք սույն հաղորդագրությունից, անցկացված խորհրդակցության ժամանակ առողջապահության նախարար Արմեն Մուրադյանը ներկայացրել է որոշ ցուցանիշներ, որոնց համաձայն' Հայաստանում ժողովրդագրական իրավիճակը գնալով բարելավվում է: Ըստ զեկուցողի՝ Հանրապետությունում ներդրված ծննդօգնության հավաստագրի արդյունքում՝ էապես բարձրացել է ապագա մայրերի առողջապահական վերահսկողությունը, ծննդօգնության հավաստագրի ծրագրի տարեկան ֆինանսավորումը 4 միլիարդ դրամից հասցվել է 7 միլիարդի, ինչի արդյունքում՝ էապես կրճատվել են մայրական և նորածնային մահացության դեպքերը:

Մասնավորապես՝ 2013 թվականի ընթացքում հանրապետությունում արձանագրվել է մայրական մահացության 8, իսկ 2015-ին՝ 5 դեպք: 1000 կենդանածինների հաշվով 2011-ին նորածնային մահացության ցուցանիշը կազմել է 11,7 տոկոս, իսկ 2014-ին՝ 8,7:

Բանից պարզվում է՝ մեր պաշտոնյաները որևէ այլ բանի մեջ այնքան վարժ չեն, որքան՝ իրականությունը կոծկելու, ինչի նպատակով հաճախ ստիպված են լինում դիմել զանազան աճպարարությունների ու հնարքների (այս զեկույցը դրա վառ ապացույցն է): Խնդրում ենք ուշադրություն դարձնել մի կարևորագույն հանգամանքի վրա. նախարարը ներկայացրել է բացառապես այն համեմատությունները, որտեղ ցուցանիշների հստակ բարելավում է նկատվում: Իսկ վատթարացած ցուցանիշների մասին այս զեկույցում, ինչպես կռահեցիք, ակնարկ անգամ չի եղել: Որքան էլ կառավարությունը ցանկանա ինքն իրեն խաբել ու բացառապես ինքնաներշնչման արդյունքում հանգել այն մտքին, թե Հայաստանում ամեն բան լավ է, դժվար թե կարողանա մոլորության մատնել մի ողջ ժողովրդի: Իրականությունն այն է, որ մենք 2015-ին ունենք վատթար արդյունքներ գրեթե բոլոր բնագավառներում. տնտեսությունը խորտակված վիճակում է, իսկ չդադարող արտագաղթն այլևս դարձել է շատերի համար կենսակերպ: Թե առողջապահական ինչ-ինչ տվյալներ ինչպիսի համադրության մեջ կարող են գտնվել դրսում տիրող իրավիճակի հետ, մնում է մշուշոտ: Այս ամենից ուղղակիորեն հետևում է, որ Կառավարությանը երկրում տիրող ժողովրդագրական իրավիճակի ճշգրիտ պատկերը ընդհանրապես չի հետաքրքրում: Հետաքրքրում է միայն աշխատանքի պատրանք ստեղծելը և ձեռքի հետ ինքնագովազդային հաղորդագրություններ տարածելը. մարդիկ սեփական անձերի փիառով են զբաղված, էլ ի՞նչ եք ուզում սրանից առավել: Իսկ փաստերը, որոնք այդքան հմտորեն կոծկվում են մերոնց կողմից, բնավ էլ հուսադրող չեն ու խոսում են ոչ թե առաջընթացի, այլ՝ ճիշտ հակառակի մասին. այս տարվա առաջին 9 ամիսների տվյալներով՝ Հայաստանում ծնված երեխաների թիվը կազմել է 30666, ինչը 792-ով պակաս է անցած տարվա նույն ժամանակահատվածի ցուցանիշից: Այս նույն ժամանակահատվածում արձանագրվել է մեռելածնության 625 դեպք՝ անցած տարվա 578-ի փոխարեն: Մինչեւ մեկ տարեկան մահացած երեխաների թիվը այս տարի կազմել է 280՝ անցած տարվա 273-ի դիմաց: Տեսնես մեր հարգարժան նախարարը գոնե ինչ-որ կերպ ծանո՞թ է այս թվերին, թե՞ սավառնում է միայն իր կողմից հորինված աշխարհներում, ուր ամեն բան լավ է, հիանալի:

Սարկազմը՝ սարկազմ, բայց կարծում ենք, որ սուտ հորինելիս ոմանք պետք է մի փոքր ավելի իրատեսական լինեն և այնպիսի մի սուտ բստրեն, որ կլինի գոնե ճշմարտանման, որ հավատներս գա, թե չէ որ իրենց մնա, այնպիսի բաներ կպատմեն, որ կարող է տպավորություն ստեղծվել, թե հեքիաթային Լապլանդիայում ենք ապրում՝ կտրված այս աշխարհի դաժան իրականությունից:

Դավիթ Բաբանով