Նախկին ընդդիմադիրը

ԲՀԿ նախագահուհի Նաիրա Զոհրաբյանի կյանքն ու գործունեությունը, անշուշտ, մեզ համար պարզ ու թափանցիկ են հայրենական ընտրությունների նման: Դա նրանից չէ, որ նա զուլալագույն քաղաքական կերպար է, այլ թափանցիկությունն այն հանգամանքի հետ է կապված, որ մշտապես եղել է տարատեսակ քաղաքական ինտրիգների կիզակետում և իր զվարթ ձայնով իր վրա է գամել անգամ այն մարդկանց ուշադրությունը, ովքեր քաղաքականությունից հոգնած ննջել են հեռուստացույցի առաջ, սակայն այս պատգամավորուհու աղեկտուր ձայնից սրտատրոփ վեր են թռել և մի քանի րոպե փորձել են հասկանալ այդ հնչյունների հավաքականությունը:

Ժամանակին հակաիշխանական կրքոտ ելույթների թոփ հորիզոնականները նվաճած սույն տիկինը վերջին քաղաքական զարգացումներից հետո կրկին հայտնվել է հարազատ միջավայրում՝ այն է՝ ինտրիգներ, քաղաքական առևտուր, քաղաքական կապիտալը թանկ ու էժան վաճառելու բազարներ և այլն: Ավելորդ չէ նշել, որ նախկին ընդդիմադիր Նաիրան այժմ իրեն շատ տաքուկ է զգում Հովիկ Աբրահամյանի բարձր հովանու ներքո, այնքան տաքուկ, որ արդեն սկսել է զառանցել և «տաքուկ» հայտարարություններ անել:

Օրինակ՝ սույն տիկինը վերջերս ընդդիմադիր պատգամավորներին, ասենք՝ Զարուհի Փոստանջյանին մեղադրում է անիմաստ քննադատելու, ջուր ծեծելու, կեղծ հայտարարություններ անելու և այլ մեղքերի մեջ: Մեղա՜, մեղա՜, ո՞վ է խոսում կեղծիքից: Տիկի՛ն, սա նման է նրան, որ գողն առաջինն է գոռում՝ բռնե՛ք գողին: Այս ու՞ր հասաք, ու այս ինչքա՞ն իջեցրեցիք քաղաքական գործչի նշաձողը:

Ոչ վաղ անցյալում երկրի իշխանություններին մեղադրում էիք հնարավոր ու անհնար բոլոր մեղքերի մեջ: Այժմ, սակայն, վարչապետական բարձր հովանին փոխել է ձեր ընդդիմադիր հռետորաբանությունը, և կատաղի լեդին վերածվել է փափկասուն տիկնոջ: Դուք, Նաիրա, միգուցե կարող եք օրը մեջ փոխվել ու ճամբարներ փոխել, բայց մարդիկ, փառք Աստծո, ամեն ինչ շատ լավ տեսնում ու հիշում են:

Արամ Հակոբյան