Չալդրանյանի «Վարդապետի լռությունը» ֆիլմը հնարավոր է ներկայացվի «Օսկարի»

«Շարմ Հոլդինգը» հնարավոր է ռեժիսոր Վիգեն Չալդրանյանի' Կոմիտասին նվիրված «Վարդապետի լռությունը» ֆիլմը ներկայացնի «Օսկարի»: Այս մասին «Մոսկվա» կինոթատրոնում դեկտեմբերի 24-ին ֆիլմի' լրատվամիջոցների ներկայացուցիչների մասնակցությամբ ցուցադրությունից հետո տեղեկացրեց «Շարմ Հոլդինգ»-ի կոորդինատոր Մարինա Վարդանյանը:

«Ֆիլմին սպասում է երկար ճանապարհ, նաև փառատոնային: Չեմ ուզում փակագծերը բացել: Այն «Օսկար»-ին ներկայացնելու մտադրություն կա: Ֆիլմը կդիտեն Հայաստանում և Ղարաբաղում»,- «Արմենպրես»-ի փոխանցմամբ' նշեց Մարինա Վարդանյանը:

Ֆիլմի ռեժիսոր Վիգեն Չալդրանյանը կինոնկարն, իր բնորոշմամբ, սարսափելի պատասխանատվության զգացումով է արել:

«Փորձում էի քիչ խոսել: Գործ ունեի մի մարդու հետ, որն ըստ ֆիլմի, մեր հայոց խիղճն է եղել, և որի վերադառնալու խնդիրն ունենք այսօր: Մենք խնդիր ունենք վերադառնալու կոմիտասյան արժեքներին: Ես գնահատական չեմ կարող տալ: Ես իմ ստեղծագործական կյանքում եթե խնդիր եմ դնում, հասնում եմ դրան: Ես մի տաղանդ ունեմ' կարողանում եմ իմ շուրջ համախմբել տաղանդավոր, նվիրյալ, հետաքրքիր մարդկանց»,- նշեց նա:

Վիգեն Չալդրանյանի խոսքով' նա միշտ փորձել է մտավորականների մասին խոսել իր ֆիլմերում:

«Ինձ հետաքրքիր է մտավորականը, ով ձևավորում է ազգի դիմագիծը, տեսակը. այս անգամ թող գրող լինի, ինչու ոչ: Այս ֆիլմի սցենարի վրա Ռուբեն Հովսեփյանն է աշխատել, հետաքրքիր ձեռագիր է բերել իր հետ»,- շեշտեց նա:

Չալդրանյանը փաստում է' ֆիլմում կային վավերագրական կադրեր:

«Ես փորձում էի պահել վավերագրությունը, իմպրովիզներ են արվել: Կոմիտասին այսօր պետք է փնտրենք մեր մեջ: Մենք պետք է լինենք Կոմիտասի ժառանգորդները: Կինոյում որպես փիլիսոփայական կատեգորիա վերցված էր Կոմիտասի լռությունը, և դրա շուրջն էր ծավալվում ամեն ինչը»,- հավելեց նա:

Չալդրանյանը հույս ունի, որ ֆիլմը հետաքրրքություն կարթնացնի և ոչ միայն հայ, այլև օտար հանդիսատեսի վրա պետք է ազդեցություն ունենա:

«Ես լավագույն արտադրողներից մեկն եմ, միշտ գլուխ եմ գովում, որովհետև չպետք է թողես գործը թթվի, պետք է կարողանաս արագ ասելիքդ հասցնես: Մեկ տարի են տևել աշխատանքները: Բյուջեն շատ համեստ է, բայց չեմ տրտնջացել: Հայոց ցեղասպանության տարելիցի միջոցառումները համակարգող հանձնաժողովի կողմից հատկացվել է 50 մլն դրամ, 35 մլն դրամ էլ Մշակույթի նախարարությունն է տրամադրել: Գումարած' բազմաթիվ օգնողներ ենք ունեցել»,- շեշտեց նա:

Վիգեն Չալդրանյանը Համազգային պետական թատրոնում տեղի ունեցած «Համլետ»-ի պրեմիերայից հետո որոշել էր, որ գլխավոր դերը պետք է Վարդան Մկրտչյանը խաղա: Դերասանի հարսանյաց ծեսին հենց հայտարարվեց, որ հենց նա է խաղալու ֆիլմում: Վարդան Մկրտչյանի խոսքով' ֆիլմը սպասված էր:

«Այսօր առաջին ցուցադրումն էր, ֆիլմը պատկանում է հանդիսատեսին: Ես պիտի կարոտեմ այն պահերը, երբ մենք մաեստրոյի հետ աշխատում էինք ամենատարբեր վայրերում, փորձում էինք հասկանալ մտավորականի այն տեսակին, որի կարիքը կա»,- նշեց նա:

Դերասանուհի Անի Ղազարյանը Սոնայի դերի համար սափրել է գլուխը:

«Դժվար չէր գնալ զոհողությանը, որովհետև հասկանում էի' ինչի համար եմ անում: Իմ առաջին դերն է մեծ կինոյում: Ստանալ առաջարկը պարոն Չալդրանյանից, ճիշտ սկիզբ է, չգիտեմ, թե ինչպես կընթանա իմ հետագա գործունեությունը»,-նշեց նա:

Կինոռեժիսոր, դերասան, սցենարիստ Վիգեն Չալդրանյանի' Կոմիտասին նվիրված «Վարդապետի լռությունը» ֆիլմի հերոսը ժամանակակից ճանաչված գրող է և համալսարանի ժուռնալիստիկայի ֆակուլտետի դասախոս: Նա սևեռված է Կոմիտաս վարդապետի մասին վեպի ստեղծման վրա: Վեպին ճշմարտացիություն հաղորդելու նպատակով' հերոսը փորձում է անցնել իր գրական կերպարի տառապանքի քառուղիներով: Հենվելով պատմական փաստերի, արխիվային նյութերի, հոգեբանական վարկածների վրա՝ հերոսը փորձում է բացահայտել Կոմիտաս վարդապետի կենսագրության փարիզյան շրջանը, վեր հանել Վիլ-Ժուիֆ մեկո ւսարանում մեծ հայորդու կյանքի վերջին տարիների առեղծվածը: Կինոնկարը դեկտեմբերի 25-ից հնարավոր կլինի դիտել մեծ էկրաններին: Դրամայի սցենարի հեղինակը Վիգեն Չալդրանյանն է, մասնակցությամբ Ռուբեն Հովսեփյանի: Դերերում հանդես են գալիս Վարդան Մկրտչյանը, Անի Ղազարյանը, Արտո Խաչատուրյանը, Վաչե Շարաֆյանը և ուրիշներ:

Ֆիլմում հնչում է Կոմիտասի, Կլոդ Դեբյուսիի, Ավետ Տերտերյանի երաժշտությունը:

Կինոնկարի պրոդյուսերներն են Վիգեն Չալդրանյանը, Գևորգ Գևորգյանը, Կարեն Ղազարյանը: Գործադիր պրոդյուսերն է Սահականուշ Սահակյանը: