Թանաքը՝ «լևի» եկամտի աղբյուր

Պարզվում է՝ ՀՀ կենտրոնական ընտրական հանձնաժողովը ևս երբեմն փոքրիկ խորամանկությունների է դիմում՝ պետական կերակրատաշտից սեփական փոքրիկ մասը ստանալու համար: Այսպես. համաձայն օրաթերթերից մեկի կողմից տարածած հաղորդագրության՝ ՀՀ կենտրոնական ընտրական հանձնաժողովն այս տարվա հոկտեմբերի 12-ին «Բալենո սասթենիբլ գլոբալ դեվելոփմենթ» ընկերության հետ կնքած պայմանագրով 2 հազար 300 հատ անհետացող թանաքի սրվակ եւ դրոշմակնքման բարձիկ է գնել: Մեկ սրվակի եւ բարձիկի համար ԿԸՀ-ն վճարել է ընդհանուր 8 հազար 550 դրամ: Ընդհանուր հաշվով ԿԸՀ-ն վերը նշված ընկերությանը վճարել է 19 մլն 214 հազար դրամ: Այսքանից հետո բնական հարց է ծագում՝ եթե ընտրական տեղամասերի ընդհանուր թիվը ընդամենը 1997 է, ինչո՞ւ է ԿԸՀ-ն տեղամասերի թվից 300-ով ավել թանաք եւ բարձիկ գնել: Խոսքը, ըստ էության, գնում է պետական միջոցների վատնման մասին, ինչը այնքան տարածված է մեր երկրում: Կարծում ենք՝որևէ մեկի համար զարմանալի չի կարող լինել սույն հանգամանքը, քանի որ խոսում ենք մի կառույցի մասին, որի «քաջագործությունների» պտուղները հաճախ ստիպված են լինում քաղել ազգովի. ընտրակեղծիքները կոծկելու մեջ նրանցից հմուտ մեկը չկա Հայաստանում: Հետո էլ խոսում ենք թանաքների մասին… Երանի չէ՞ր ամեն բան թանաքներով սկսվեր ու ավարտվեր:

Այս ամենը ևս մեկ ավելորդ անգամ փաստում է այն պարզ ճշմարտությունը,որ Հայաստանում չես կարող գտնել մի որևէ պետական մարմին,որը զերծ կլիներ կոռուպցիոն դրսևորումներից: Ամենքը իրենց բաժինն են ուզում, ամենքն էլ մի կտոր ոսկորի կարիք ունեն...

Դավիթ Բաբանով