Մարդկային ճակատագրեր խորտակողները

Ինչո՞վ են տարբերվում բուքմեյքերական գրասենյակները խաղատներից: Վերջիվերջո, երկու տեղում էլ մարդիկ հիմնականում գումար են կորցնում, երբեմն՝ տանուլ տալիս իրենց ողջ ունեցվածքը: Երկու տեսակի հաստատություններն էլ ունեն մարդկային ճակատագրեր խորտակելու հատկություն: Խաղատների հարցը ժամանակին լուծվեց և դրանք դուրս հանեցին մայրաքաղաքից, ինչը նպաստեց նրան, որ ավելի քիչ թվով մարդիկ են տրվում այդ գաղթակղությանը, և մանավանդ ոչ մեծ եկամուտ ունեցող մարդիկ անհամեմատ ավելի քիչ հնարավորություն են ունենում այցելել նման վայրեր և խորտակել իրենց ու իրենց ընտանիքների կյանքը:

Սակայն բուքմեյքերականները մնացին: Միգուցե մեր պետությունը դրա մեջ վտանգ չի տեսնում, բայց վերջին հաշվով էությունը նույնն է, և նման հաստատություններն իրենց հետ չեն կարող բերել դրականը, նման հաստատություններում, բնականաբար, կլինեն նաև վեճեր, որովհետև մարդիկ խոշոր գումարներ են կորցնում, կլինեն նույնիսկ սպանություններ:

Մի սպանություն էլ երեկ եղավ, ու հիմա թեև շատերը կասեն, թե ի՞նչ կապ ունի բուքմեյքերականը, և որ մարդկանց ոչ ոք չի ստիպում այնտեղ գնալ, սակայն, ես կարծում եմ՝ կապ ունի և նման վայրերում հանցագործություններ կատարվելու հավանականությունն ավելի մեծ է: Այո, մարդկանց չեն ստիպում գնալ նման վայրեր, բայց գայթակղում են՝ նման հաստատությունները խոշոր բնակավայրերում կառուցելով: Իսկ գայթակղությունն ուժեղ գործոն է։

Կարեն Վարդանյան