Ո՞ւմից պակաս տղա ա...

Ինչ ուզում եք՝ ասեք, սակայն պետք է խոստովանել, որ սահմանադրական վերջին հանրաքվեն շատերի խաղաքարտերը, այնուամենայնիվ, խառնել է: Բանից պարզվում է, որ դրա վերաբերյալ ԱՄՆ կողմից հնչեցրած գնահատականները ոչ միայն բարոյական վնաս հասցրեցին մեր իշխանավորներին, այլև սպառնում են վերածվել շատ կոնկրետ ու շոշափելի պատուհասի. Ամերիկան հիասթափված է, իսկ դա նշանակում է Արևմուտքից հոսող զանազան դրամաշնորհների ու վարկերի՝ եթե ոչ իսպառ դադարեցում, ապա գոնե դրանց էական կրճատում:

Եվ ահա, արի ու տես, որ այս ողջ պատմության մեջ գլխավոր տուժող կողմերից մեկը կարող է դառնալ ոչ այլ ոք, քան նույն ինքը՝ Դավիթ Հարությունյանը, որը, ինչպես գիտենք, 2014թ-ից զբաղեցնում է ՀՀ կառավարության աշխատակազմի ղեկավար-նախարարի պաշտոնը. միանգամայն իրական է դարձել վտանգը, որ ԱՄՆ կողմից խոստացված 750 հազար ԱՄՆ դոլար գումարը, որ հատկացվելու էր ՀՀ վարչապետին կից՝ Կոռուպցիայի դեմ պայքարի խորհրդի աշխատանքներին աջակցելու համար,այդպես էլ կարող է խոստում մնալ, ինչի արդյունքում՝ մի քանիսը կարող են «տակ տալ» իրենց նախատոնական հաշվարկներում: Բայց մինչ ԱՄՆ դեսպան Ռիչարդ Միլսը հստակ ազդանշաններ է ուղարկում մերոնց, թե ԱՄՆ-ը չի վճարի նախապես խոստացած գումարը, եթե կոռուպցիայի դեմ պայքարի ուղղությամբ ՀՀ կառավարության քայլերը տեսանելի չլինեն, վերջինս որոշել է՝ ինչ էլ լինի, ամեն գնով հասցնել ստանալ ԱՄՆ կողմից խոստացած փողը: Բանից պարզվում է, որ կառավարության աշխատակազմի ղեկավար-նախարար Դավիթ Հարությունյանը կառավարության տարեվերջյան նիստին ներկայացրել է նախագիծ, որով առաջարկվում է թույլատրել Հայաստանի կառավարության աշխատակազմին ՀՀ ֆինանսների նախարարության տեղական գանձապետական բաժանմունքում բացել կառավարության աշխատակազմի արտաբյուջետային միջոցների հաշիվ՝ ՀՀ կառավարության և ԱՄՆ ՄԶԳ կնքված «Օժանդակություն՝ Հայաստանի հակակոռուպցիոն ռազմավարության իրականացմանը ծրագրի վերաբերյալ» համաձայնագրի իրականացման և ՀՀ հակակոռուպցիոն ռազմավարության 2015-2018թթ. միջոցառումների իրականացումն ապահովելու նպատակով միջազգային կազմակերպությունների կողմից օժանդակվող ծրագրերին տրամադրվող գումարների շրջանառությունն ապահովելու համար: Այս ամենում ամենահետաքրքրականն այն է, սակայն, որ գումարը տնօրինելու է ՀՀ կառավարության աշխատակազմը՝ Դավիթ Հարությունյանի գլխավորությամբ: Սույն համաձայնագրով նախատեսվում է ՀՀ կառավարության աշխատակազմին տրամադրել 750 հազար դոլարի ֆինանսական օժանդակություն 1 տարվա համար՝ փորձագիտական հանձնախումբ ձևավորելու և տեխնիկական կարողություններ ձեռք բերելու նպատակով: Դավիթ Հարությունյանն էլ,իր հերթին, խոստանում է՝ որոշման ընդունումը կապահովի ԱՄՆ ՄԶԳ-ի կողմից օժանդակվող ծրագրին տրամադրվող գումարի «նպատակային շրջանառությունը»:

Կարո՞ղ եք ասել մեզ, թե, օրինակ, հատկապես ումից է պակաս Դավիթ Հարությունյանը, որևէ մեկդ կարո՞ղ եք հստակ փաստարկված պատասխան տալ այս հռետորական հարցին: Մարդն ի ծնե բոլոր տվյալներն ունի՝ որևէ մեկից հետ չմնալու համար. երիտասարդ է, չափազանց խելացի, հմուտ՝պետական կառավարման գործում: Այսքանից հետո էլ ո՞ւմ լեզուն կպտտվի մի «թթու» խոսք ասել Հարությունյանի հասցեին: Ո՛չ, մեզ լա՛վ հասկացեք, մենք նույնպես չենք պատրաստվում արատավորել մարդու անունը, ուղղակի ակամա տարակուսանքների մեջ ենք ընկել, թե որն է այն ջերմեռանդության պատճառն ու բուն շարժառիթը, որը ստիպում է մեր հերոսին էս նեղ-մաջալին նախագծել նախագծեր ու հապճեպ կերպով հարազատ Կառավարության դատին հանձնել դրանք: Հանկարծ մի մեղավոր միտք ծագեց մեր ոչ լուսավոր ուղեղներում. իսկ ի՞նչ, եթե այս ամենը ընդամենը փոքրիկ խորամանկություն է, պստիկ, բայց ճստիկ հնարք, որի իրական նպատակը ոչ թե երկրում արմատացած կոռուպցիան արմատախիլ անելն է, այլ դրա քողի ներքո մի քանի հարյուր հազար դոլար գրպանելը: Խնդրում ենք մեզ էլ ըմբռնեք, մենք ոչ մեկին աններելի հանցանքների մեջ չենք զրպարտում, քավ լիցի, պարզապես մեզ շրջապատող իրականությունն այնքան դաժան է ու քստմնելի, որ կասկածելի են թվում նույնիսկ ամենալուսավոր ու փայլուն նախաձեռնություններն ու մտքերը, հատկապես նրանք,որոնք ծագում են մեր չինովնիկների փայլուն ուղեղներում:

Մնում է պարզապես հույս հայտնել, որ Դավիթ Հարությունյանը չի դրժի իր խոստումն ու մինչև վերջ հավատարիմ կմնա համամարդկային արժեքներին, հակառակ պարագայում՝ ստիպված կլինենք ամրագրել՝ մեր անբարեխիղճ չինովնիկական աստղաբույլը համալրվեց ևս մեկով…

Դավիթ Բաբանով