Քաղքենիությունը և «գյոռմամիշությունը»

Եթե ուշադիր հետևենք հեռուստատեսային գովազդներին, ապա կնկատենք, որ Ամանորին ընդառաջ ավելացել են բանկերի կողմից քաղաքացիներին առաջարկվող վարկերի տեսակները: Սա, իհարկե, անմիջական կապ ունի գալիք տոների և մեր հասարակության զգալի մասի մոտ արմատավարոված այն արատավոր սովորույթի հետ, որ ամանորյա սեղանը պետք է լինի հնարավորինս ճոխ, թեկուզ դրա համար մարդը հետագա 1 տարին ստիպված պետք է լինի 2-3 տեղ աշխատել, որպեսզի մարի հերթական վարկը: Եվ այդպես մինչև հաջորդ Ամանոր:

Իհարկե, շատերը մեղադրում են այս հարցում բանկերին, նաև սուպերմարկետներին, որ բանկերի հետ նման գործարքների մեջ են մտնում, բայց վերջիններս ընդամենը բիզնես են անում ու շարժվում «պահանջարկն է ծնում առաջարկ» սկզբունքով: Ամանորյա վարկերն առաջարկվում են, որովհետև կան այդ վարկերը վերցնողներ, և նրանք շատ են, քաղքենիությունը և «գյոռմամիշությունը» արմատավորված են մեր հասարակության մի մասի մեջ:

Մեղավորներ փնտրելը միշտ հեշտ է, բայց երևույթը միշտ էլ կլինի, քանի դեռ մենք չենք ուզում հասկանալ այն առաջացնող պատճառը: Դա մեր մտածելակերպն է, որը փոփոխության կարիք ունի, և այն փոխելու արդյունքում ինքնին կվերանան շատ արատավոր երևույթներ:

Կարեն Վարդանյան