Երևանցիների համար առաջնահերթ են տրանսպորտի, կոմունալ վարձի, աղբահանության հետ կապված խնդիրները

Մայրաքաղաքաբնակները GALLUP International association»-ի «Երևանցիները Երևանի մասին» հետազոտության ժամանակ նշել են, որ վերջին մեկ տարվա ընթացքում Երևանում բարեկարգվել է քաղաքի տեսքը, կառուցվել են խաղահրապարակներ, տեղադրվել են նոր նստարաններ: Հարցվածները հնարավորություն են ունեցել գնահատելու քաղաքապետարանի, համայնքների և ոստիկանության աշխատանքը:

«5-րդ տարին ենք անցկացնում նման հետազոտություն: Կարող ենք տեսնել դրական և բացասական փոփոխություններ: Դեմ առ դեմ հարցումներ են իրականացվել: Հարցումների քանակը եղել է 1260-ը, հետազոտության իրականացման ժամանակահատվածը' դեկտեմբերի 3-22-ը: Հետազոտությունն անցկացվել է Երևանում: Հարցին «Ինչպես կգնահատեք ընդհանուր առմամբ Երևան քաղաքի փոփոխությունները վերջին 1 տարվա ընթացքում», հարցվածների 51 տոկոսը «ավելի շուտ դրական» է պատասխանել, 7 տոկոսը' «լիովին դրական», 15 տոկոսը' «ավելի շուտ բացասական» , 13 տոկոսը' «ընդհանրապես բացասական», 13 տոկոսն էլ' դժվարացել է պատասխանել»,- տեղեկացրեց «GALLUP International association»-ի հայաստանյան ներկայացուցչության տնօրեն Արամ Նավասարդյանը:

Մայրաքաղաքաբնակները Երևանի առջև կանգնած ամենակարևոր խնդիրներ են նշել տրասնպորտի, կոմունալ վարձի, աղբահանության հետ կապված հարցերը:

«Քաղաքապետարանի, թաղապետարանների կողմից իրականացրած դրական փոփոխություններ (ծրագրեր) են նշվել քաղաքի տեսքի բարեկարգումը, խաղահրապարակների կառուցումը, նստարանների տեղադրումը, այգիների, բակերի բարեկարգումը, ասֆալտապատումը»,-նշեց Արամ Նավասարդյանը:

Երևանցիների 50 տոկոսը կցանկանար, որ մայրաքաղաքում ավելանան կանաչապատ տարածքները, 18 տոկոսը' կառուցվեն նոր խաղահրապարակներ, իսկ մյուս մասը, որ ավելանան մշակութային, սպորտային միջոցառումները և շաբաթօրյակները:

«Մաքրության, անվտանգության, կանաչապատ լինելու և լուսավորության առումով ամենաբարձր ցուցանիշները գրանցվել են Երևանի Ավան և Կենտրոն համայնքները: Կենտրոնը լուսավորության հետ կապված շատ բարձր բալեր է ստացել: Ամենացածր միավորներ են ստացել Նուբարաշենը, Քանաքեռ-Զեյթունը և Շենգավիթը»,-տեղեկացրեց Արամ Նավասարդյանը:

Երևանի զբոսաշրջության զարգացման համար որպես կարևոր նախապայման քաղաքացիների 47տոկոսը նշել է հին շինություննների պահպանում, 37 տոկոսը' Հին Երևանի վերականգնումը, 21 տոկոսը' կանաչապատ տարածքների ավելացում, 15 տոկոսը' լուսավորության ավելացումը : Նշվել են նաև այլ առաջարկներ:

Ամենաբարձրը գնահատվել են Երևանի քաղաքապետի, Ավանի, Դավիթաշենի թաղապետերի կատարած աշխատանքը, ամենացածրը' Աջափնյակի թաղապետինը:

Երևանի քաղաքապետարանի ներդրումների վարչության պետ Արմեն Հարությանը շնորհակալություն հայտնեց «GALLUP International association»-ին նման հարցում կատարելու, ինչպես նաև երևանցիներին' ակտիվ մասնակցելու համար:

«Հնարավորություն է ստեղծվում երևանցիների կարծիքը լսել կատարված աշխատանքների վերաբերյալ: Աղբահանությունը, լուսավորությունը, տրանսպորտը , կանաչ տարածքների ավելացումը համահունչ են Երևանի զարգացման ծրագրի գերակայություններին: Երևանի քաղաքապետարանը պատասխանատվություն է ստացել մինչև 2020 թվականը 20 տոկոսով ջերմոցային գազերի կրճատում ապահովել, որը լուսավորության արդիականացման ծրագիրը բաղադրիչ է կազմում»,-նշեց նա:

Արմեն Հարությանը շեշտեց, որ արդեն իսկ 10-ը համայնքներում աղբահանություն է իրականացնում «Սանիտեք» ընկերությունը, և որոշ համայքներում այն մուտք չունի:Նա նաև հավելեց, որ քաղաքացիները չսահմանված վայրերում հաճախ են աղբ թափում, և անհրաժեշտ է, որ երևանցիները զերծ մնան դրանից:

«Կանաչապատ տարածքների ավելացումը գերակայություններից է, տարեցտարի ավելանում են կանաչ տարածքները: Վերջին 2 տարիներին մշակութային և սպորտային ծրագրերը նունյպես ավելացել են, կազմակերպվեց Կիսամարաթոն, շատ հետաքրքիր միջոցառում էր, Ձմեռ պապերի վազք իրականացվեց: Հաջորդ տարի կշարունակվեն հաջողություն ունեցած ծրագրերը, կիրականացվեն նաև նոր ծրագրեր»,-եզրափակեց նա: