«Սիմվոլը», «չեկիստներն» ու «սատանայի փաստաբանը»

Այսօր հերթական «մանրահավաքն» է սպասվում Ազատության հրապարակում, որը չի բացառվում, որ «Նոր Հայաստանի» և Րաֆֆի Հովհաննիսյանի 4-5 հոգիանոց «հուժկու հանրահավաքներից» նույնիսկ մի փոքր ավելի մարդաշատ լինի: Հասկացաք, որ խոսքս Պարույր Հայրիկյանի կողմից հայտարարված՝ Եվրամիության դրոշներով հերթական միջոցառման մասին է, որը մեզ խոստանում է «ցնցող բացահայտումներ»:

Մի երկու բառով նախապես ասեմ նաև Հայրիկյանի՝ երեկվա հարցազրույցում արած այդ «բացահայտման» բովանդակությունը, որ մի քիչ «ցնցվեք». պարզվում է՝ հանրաքվեի արդյունքները կեղծված են եղել: Ցնցվեցիք, չէ՞: Չէ՞ որ դուք չգիտեիք, որ հանրաքվեն կեղծվել է, առաջին անգամ ենք այդ մասին լսում և իմանում ենք այդ մասին միայն Հայրիկյանի շնորհիվ, հակառակ դեպքում այսպես չտեղեկացված էլ կմնայինք:

Իսկ հիմա արդեն կտեղեկանանք, նա կգա և մեզ կլուսավորի և կստեղծի մի նոր Հայաստան, որը «Նոր Հայաստանը» չէ, այլ «Ազատ Հայաստանն» է՝ Եվրամիության դրոշներով, որովհետև «Նոր Հայաստանն» էլ արդեն «սիմվոլի» կողմից պիտակավորվեց որպես «չեկիստական» կառույց, նրա ծագումն էլ վերագրվեց ռուսական «ԿԳԲ»-ին: Բայց ամենահետաքրքիրը Հայրիկյանի նոր «բացահայտումն» էր Րաֆֆի Հովհաննիսյանի մասին. պարզվում է՝ Րաֆֆին կատարում է «Սատանայի» սպասավորի հրահանգները, այլ կերպ ասած՝ «Սատանայի փաստաբանը» հայտնի ֆիլմի մեջի՝ Կիանո Ռիվզի մարմնավորած կերպարն է:

Հետաքրքիր է՝ եթե Րաֆֆի Հովհաննիսյանը հիմա ԱՄՆ-ում չլիներ և կարդար «սիմվոլի» հարցազրույցը, իրեն շոյված կզգա՞ր, թե՞ Հայրիկյանից «բադասխան» կուզեր:

Կարեն Վարդանյան