Ուղերձ` դեսպանից

Ինչպես գիտենք, ըստ ընդունված կարգի, ամանորի նախաշեմին տարբեր տրամաչափի պաշտոնյաներ հանդես են գալիս ժողովրդին ուղղված շնորհավորական ուղերձներով, որոնցում շեշտադրում են ինչպես անցնող տարվա անելիքները, այնպես էլ խոսում են գալիք տարվա ծրագրերի մասին:

Այս գեղեցիկ ավանդույթը վերաբերում է ոչ միայն տեղական պաշտոնյաներին, այլև օտարերկրյա դեսպաններին, որոնք ևս հանդես են գալիս ամանորյա շնորհավորանքներով ու բարեմաղթանքներով' ուղղված հասարակությանն ու պետությանը: Որպես կանոն, այդ շնորհավորանքներն ամենևին էլ ինքնանպատակ չեն լինում ու շատ հաճախ իրենց մեջ պարունակում են նրբերանգներ ու դիվանագիտորեն քողարկված ուղերձներ, որոնք էլ հենց արտասանվող տեքստի բովանդակության հիմնական մեխն են հանդիսանում:

Ինչպես պարզվում է ՀՀ-ում ԱՄՆ դեսպանըˋՌիչարդ Միլզը, առաջիններից է շտապել հանդես գալ ամանորի ուղերձով, որում, բացի շնորհավորական քաղցր-մեղցր խոսքերից, մի ինքնատիպ իրադարձության մասին պատմող մեջբերում է կատարելˋ ասելով. «Հայացք նետելով դեպի գալիք տարին՝ մի ցանկություն եմ ուզում հայտնել, որը լսել եմ Հատուկ օլիմպիական խաղերի մասնակից 14-15 տարեկան մի պատանուց, ով Հայաստանի հատուկ օլիմպական թիմի կազմում մասնակցել էր Լոս Անջելեսում վերջերս անցկացված հատուկ օլիմպիական խաղերին: Թերևս, գիտեք, որ հատուկ օլիմպիական խաղերը նախատեսված են մտավոր սահմանափակումներով մարզիկների համար: Երբ զրուցում էի նրա հետ, հարցրեցի, թե ինչով է նա կարևորում իմ ներգրավվածությունը հատուկ օլիմպիական թիմում, և այս պատանին, ում անունն Արմեն է, ասաց. «Պ-ն դեսպան, իմ ծնողները մեծ հպարտություն ապրեցին ինձ համար, ու, բացի այդ, այսպիսի բարդ ծրագրին մասնակցելը կօգնի ինձ իմ կյանքի հետագա բարդություններն առավել համարձակորեն հաղթահարել: Կարծում եմ գալիք 2016թ. ընթացքում ինձ առաջնորդելու են Արմենի խոսքերը, ինքս ինձ հարցնելու եմ՝ արդյոք ես կամ դեսպանությունն անո՞ւմ ենք այն, ինչով մեր ծնողները կհպարտանային: Եվ որ ամենակարևորն է, ես ասելու եմ՝ եկեք վստահություն ունենանք, դժվար բաներ անելու վստահություն: Հայ ժողովրդի հետ համատեղ աշխատանքի շնորհիվ մենք արձանագրել ենք հաջողություններ: Անկախության ավելի քան 24 տարիների Հայաստանի նվաճումներն ինձ մեծ հույսեր են տալիս 2016 թվականի համար: Լիահույս եմ, որ ձեզ նույնպես: Ամենայն բարիք և շնորհավոր Նոր տարի»:

Եվ այսպես, ի՞նչ կարող է սա նշանակել, կամ ի՞նչ էր ցանկանում հասկացնել Միլզը' մեջբերելով իր ու պատանու երկխոսությունը: Մեր խորին համոզմամբˋ մեկ բան. եկող տարին մի շարք հարցերում բեկումնային է լինելու, և այս առումով' ԱՄՆ սպասելիքները Հայաստանից, իսկ ավելի ճիշտˋ իշխանություններից, շատ կոնկրետ ենˋ լոյալություն, պատրաստակամությունˋ ընդառաջ գնալու Վաշինգտոնի պահանջներին: Առայժմ մի կողմ թողնելով հարցի արտաքին քաղաքական կողմըˋ կցանկանայինք կենտրոնանալ ներքին բաղադրիչի վրա:

Այս առումով, կարծում ենք, 2016-ը լինելու է 2015-ի տրամաբանական շարունակությունը, և ԱՄՆ-ն շարունակելու է կառավարությունից պահանջել իրականացնել հստակ քայլեր, որոնք, նախևառաջ, էապես կկրճատեն երկրում կոռուպցիայի մակարդակըˋ բարենպաստ ներդրումային դաշտ ապահովելով օտարերկրյա ընկերությունների ու առանձին ներդրողների համար:

Համենայն դեպս, դատելով հատկապես վերջին շրջանում դեսպան Միլզի գործունեությունից, հնչեցրած ելույթներիցˋ կարելի է ենթադրել, որ այդ պահանջը լինելու է առաջնահերթությունների թվում. Վաշինգտոնը, ելնելով իր արտաքին քաղաքական շահերից, ամենայն հավանականությամբ, նպատակադրվել է ԵԱՏՄ երկրներում ամրապնդել իր ֆինանսատնտսական ներկայությունը, ինչի համար, սակայն, այս երկրներում, այդ թվումˋ Հայաստանում, կոռուպցիան դարձել է իսկական խոչընդոտ, որը վանում է օտարերկրյա ներդրողին, քանի որ որքան էլ ԱՄՆ կառավարությունը ցանկանա իր համար շոշափելի ներկայություն ապահովել այս կամ այն երկրի տնտեսության մեջ, չի կարող արտասահմանցի կապիտալիստին արդյունավետորեն ուղղորդել այստեղˋառանց նրան հստակ երաշխիքներ տալու:

Կարծում ենքˋ բոլորովին պատահական չէր օրերս կառավարությունում տեղի ունեցած Կոռուպցիայի դեմ պայքարի խորհրդի երկրորդ նիստը, որին մասնակցել են նաև քաղաքական ուժերի, քաղաքացիական հասարակության, միջազգային կազմակերպությունների ներկայացուցիչները: Այստեղ զեկուցվել է, որ այս ընթացքում կառավարության կողմից հաստատվել է Կոռուպցիայի դեմ պայքարի ծրագիրը, հավանության է արժանացել «Օժանդակություն Հայաստանի հակակոռուպցիոն ռազմավարության իրականացմանը ծրագրի վերաբերյալ» ԱՄՆ ՄԶԳ-ի հետ համաձայնագիրը, որը շուտով կստորագրվի և կյանքի կկոչվի: Զեկուցվել է նաև, որ քայլեր են իրականացվում արդյունահանող ճյուղերի թափանցիկ նախաձեռնությանը միանալու գործընթացների, բիզնես հանրության հետ համագործակցության հարթակ ստեղծելու ուղղությամբ: Աբրահամյանը հանձնարարել է ՀՀ կառավարության աշխատակազմին շարունակել արդյունավետ համագործակցությունն ԱՄՆ ՄԶԳ-ի հետ և համաձայնագիրը ստորագրել 2016 թվականի սկզբին՝ սկսելով փորձագիտական հանձնախմբի ձևավորման գործընթացը:

Ակնհայտ է, որ ԱՄՆ մեսիջները սկսում են տեղ հասնել,և մերոնք,ուզած-չուզած,գոնե առերևույթ քայլեր են ձեռնարկում ԱՄՆ «աչքից չընկնելու» համար, չէ՞ որ դա կարող է «խփել» նաև իրենց գրպանին,ու Միլզը դադարի հանդես գալ միջնորդի դերումˋ կառավարությանը զանազան դրամաշնորհներ շնորհելու հարցում: Մի՞թե մտածում էիք, որ այսպիսի հապճեպությունը պայմանավորված է երկրի ապագայի վերաբերյալ մտահոգությամբ, չէ միˋ չէ…

Մենքˋ հասարակ քաղաքացիներս, որ հեռու ենք աշխարհաքաղաքական բարդ խաղերից, միանշանակորեն պետք է շահագրգիռ լինենք, որպեսզի մեր երկրում ներդրումներ արվեն, ինչը պետության համար կունենա ոչ միայն ստրատեգիական նշանակություն, այլև կհանգեցնի երկրում նոր աշխատատեղերի ստեղծմանըˋ հանապազօրյա հացով ապահովելով մեծ թվով քաղաքացիների:

Դավիթ Բաբանով