Ճշմարտությունը՝ միայն ընտրությունից ընտրություն

ԱՄՆ-ի քաղաքական գործիչները սիրում են անկեղծանալ և երբեմն նաև ճշմարտություն հիշեցնող բաներ ասել միայն նախընտրական շրջաններում: Օրինակ, նախագահներ են եղել, որ նախընտրական շրջանում հիշել են հայերի ցեղասպանության մասին, իսկ ընտրվելուց հետո մոռացել են, ոմանք էլ հիշել են ԱՄՆ-ի նախկին նախագահների կատարած հանցագործությունների և եղեռնագործությունների մասին, իսկ ընտրվելուց հետո իրենք էլ շարունակել են նույն ոգով: Հիմա էլ ԱՄՆ-ի նախագահի թեկնածու Դոնալդ Թրամփն է անկեղծացել ու հայտարարել այն մասին, ինչի մասին անձամբ ես չէի էլ կասկածում, որ դա այդպես է: Թրամփն ասել է, որ Իսլամական պետության ստեղծման մեջ իրենց մեղքի մասնաբաժինն ունեն Բարաք Օմաբան և Հիլարի Քլինթոնը:

Դոնալդ Թրամփի այս հայտարարությունը որակվել է որպես սենսացիոն, սակայն մի՞թե դա նորություն է: Միջազգային հանրության գիտակից մասը վաղուց արդեն հասկացել է, տեղեկացել է, որ Իսլամական պետությունը ստեղծել է հենց ԱՄՆ-ը, նաև Սաուդյան Արաբիայի, Քաթարի, Թուրքիայի աջակցությամբ, և որ Իսլամական պետությունն անմիջական կապ ունի «Սիրիայի ընդդիմություն» կամ «Սիրիայի չափավոր ընդդիմություն» կոչվածների հետ, և որ վերոհիշյալ կառույցները, որոնց ոման ներկայացնում են իբրև հանուն «դեմոկրատիայի» «բռնակալ» Ասադի դեմ պայքարողներ, իրականում նույնիսկ հեռավոր գաղափար չունեն այն մասին, թե ինչ է դեմոկրատիան, այլ պարզապես ստեղծված էին Սիրիայում Բաշար Ասադի ռեժիմը տապալելու նպատակով, ինչը նրանց չհաջողվեց:
Ընդհանուր առմամբ պետք է նշեմ, որ Դոնալդ Թրամփը ճշմարտացի հայտարարություն է արել, պարզապես մեկ անուն է բաց թողել. Օբամայի և Քլինթոնի անուններին Թրամփը պետք է ավելացներ նաև սենատոր Ջոն Մաքքեյնի անունը և հիշեցներ Մաքքեյնի՝ ԻԼԻՊ-ի առաջնորդ Աբու Բաքր ալ Բաղդադիի հետ համատեղ լուսանկարների մասին:

Միայն մեկ հարց է մնում՝ արդյո՞ք նախագահ ընտրվելուց հետո էլ Թրամփը կշարունակի այդպես անկեղծ լինել...

Կարեն Վարդանյան