Հունվարի առաջին տասնօրյակում հանրապետությունում գրանցվել է 676 արտակարգ պատահար

Հունվարի առաջին տասնօրյակում հանրապետությունում գրանցվել է 676 արտակարգ դեպք-պատահար,ինչը 250-ով ավելի է նախորդ տարվա նույն ժամանակահատվածից: Պատահարների արդյունքում զոհվել է 3, տուժել՝ 56 մարդ: Հունվարի 11-ին լրագրողների հետ հանդիպմանն այս մասին ասաց ՀՀ ՏԿԱԻՆ ճգմաժամային կառավարման ազգային կենտրոնի պետ Հովհաննես Խանգելդյանը:

«Ինչպես նախորդ, այնպես էլ այս տարի գրանցվել է հրդեհների 92 դեպք, ընդ որում յուրաքանչյուր տարի 1-ական զոհով: Ամանորին նվազել է ՃՏՊ-ների ցուցանիշն, այս տարի ունեցել ենք 25 դեպք, 1 զոհ և 23 տուժած»,- ասաց Խանգելդյանը՝ հավելելով, որ նախորդ տարվա նույն ժամանակահատվածում գրանցվել է 34 դեպք, զոհվել է 4, տուժել՝ 36 մարդ:

Անդրադառնալով ձյան տեղումներով պայմանավորված դեպքերին՝ կառավարման կենտրոնի պետն ասաց, որ գրանցվել է 234 արգելափակման դեպք, անվտանգ տարածք է դուրս է բերվել 1234 տրանսպորտային միջոց և շուրջ 3500 մարդ: Հունվարի 1-ից 10-ը ԱԻՆ-ը ստացել է շուրջ 10.000 զանգ:

«Ծանրաբեռնված է եղել հատկապես Գեղարքունիքի և Սյունիքի ուղղությունը, որտեղ զանգերի թվաքանակը հասնում էր առավելագույնին, որից հետո ինքնաշխատ համակարգն այդ զանգերը վերահասցեագրում էր Երևան քաղաք. այդ վիճակը շարունակվեց 2-3 օր»,- ասաց Խանգելդյանն՝նշելով, որ դա պայմանավորված էր Գորիս-Սիսիան, Գորիս-Կապան, Կապան-Մեղրի, Սևան-Մարտունի, Մարտունի-Վարդենիս ճանապարհահատվածներում ստեղծված բարդ իրավիճակով՝ պայմանավորված ցածր տեսանելիությամբ, վրաբեր տեղումներով:

Խոսելով Երևանում գրանցված արտակարգ դեպքերի մասին, ՏԿԱԻՆ ներկայացուցիչը նշեց, որ լուրջ խնդիրներ էին առաջացել բակային հատվածներում, եղել են 100-ից ավելի դեպքեր, երբ տների ջրագծերն են վնասվել, բայց դրանք եղել են հիմնականում չբնակեցված տներ: Եղել են հատվածներ, որտեղ երթևեկելը մի քիչ դժվար է եղել' հատկապես թեք հատվածներում, ինչի պատճառը 4 օր չդադարող ձյունն էր:

Արգելափակման հետ կապված գործընթացներին մասնակցել է 234 մարտական հաշվարկ և 10 օրվա ընթացքում եղել է 731 արձագանքում և, կարելի է ասել, որ 10 օրում իրականացվել է 5 ամսվա նորման: