…Իսկ ե՞րբ են պատժվելու մնացածները

Երբ Հայաստանը, իսկ նրա հետ նաև քաղաքամայր Երևանը, դառնալով տարածաշրջան ներխուժած հուժկու ցիկլոնի զոհ, վերջին օրերին բառացիորեն թաղվել էր ձյան մեջ, շատերս ակամա մեր զայրույթն էինք փորձում արտահայտել ստեղծված իրավիճակի վերաբերյալ՝ մեղադրելով ում ասես՝ վերևներից մինչև ամենաներքևներ: Մինչդեռ, հավանաբար, քչերս գիտենք, որ Հայաստանում կա մի ընկերություն, որն ի սկզբանե պատասխանատու է Երևանում ոչ միայն աղբահանություն իրականացնելու համար, այլև, ինչպես պարզվում է, ձնամաքրման աշխատանքների. «Սանիթեք» ընկերությունն է: Այս ընկերության մուտքը Հայաստան բավական աղմկոտ ստացվեց. բոլորս ենք հիշում այս ընկերության աշխատակիցների կողմից կազմակերպած ցույցը, ուր հնչում էին բազմաթիվ սոցիալական պրոբլեմներ, որ ի հայտ էին եկել այս ընկերության մեղքով: Այն ժամանակ որոշում կայացվեց ընդառաջել այս ընկերությանը՝ տալով հնարավորություն ինքնադրսևորվելու համար. տեսանք՝ ինչպես են ինքնադրսևորվում: Այս մի քանի օրերը ցույց տվեցին, որ Երևանի փողոցներն ամենևին էլ հուսալի ձեռքերում չեն, և որ այն վստահությունը, որը նկատելի էր այս ընկերության նկատմամբ, ամենևին էլ արդարացված չէ:

Համաձայնե՛ք, որ հանդուրժել այս անգործությունը, պարզապես չի կարելի, քանի որ սա այն սահմանն էր, որից անդին այլևս կատարյալ քաոս է տիրում: Ակնհայտ է, որ պետական կառույցները, որոնք էլ հենց զբաղվում են այս ընկերության գործունեության վերահսկմամբ, այլևս չեն կարող «աչք փակել» այս ամենի նկատմամբ և պարտավոր են համապատասխան պատժիչ մեխանիզմներ կիրառել այս ընկերության դեմ՝ հետագա բացթողումները կանխարգելելու համար: Թե որքան ադեկվատ կլինի համապատասխան պետական օղակների կողմից կիրառելիք պատիժը, կտեսնենք մոտ օրերս, բայց որ միայն «Սանիթեքը» չէ, որ թերացել է սեփական աշխատանքներում, ակնհայտ է: Իսկ ե՞րբ են պատժվելու մնացածները…

Դավիթ Բաբանով