«Առաջընթացն» ակնհայտ է այլևս...

Ձեռքներդ դրեք խղճներիդ ու ինքներդ ձեզ մի հարց տվեք՝ ո՞ր սուպերմարկետն է ամենալավը Հայաստանում: Ընկաք մտորումների գիրկն ու խճճվեցիք: Դե ինչ, կարծում ենք՝ դա միանգամայն սպասելի էր, քանի որ այս կամ այն վաճառակետի մասին պատկերացում կազմելու համար անհրաժեշտ է զննել ոչ թե, ասենք, տվյալ կառույցի արտաքին տեսքը՝ փորձելով էսթետիկական հաճույք ստանալ տվյալ շինությունից, այլ հարկ է, նախևառաջ, հիշել այն ապրանքների որակի մասին, որ գնել եք այս կամ այն վաճառակետից: Եթե խոսելու լինենք ժողովրդի շրջանում լայնորեն տարածված կարծիքի մասին, ապա պետք է ասենք, որ, օրինակ, բոլորիս հայտնի սեփականատիրոջը պատկանող «Երևան սիթի» սուպերմարկետների ցանցը, ցավալիորեն, չի կարող պարծենալ ամենավստահելիների թվին դասվելու հավանականությամբ, քանի որ շատ հաճախ հենց այստեղ է, որ փորձ է կատարվում հասարակության վրա «նաղդել» ժամկետանց սննդամթերք՝ հետապնդելով ընդամենը մեկ պարզ նպատակ՝ ստանալ գերշահույթ: Ահավասիկ այդպիսի դեպքերից մեկը. երեկ «Սպառողների խորհրդատվության կենտրոն» ՀԿ նախագահ Կարեն Չիլինգարյանը, տալով հարցազրույց լրագրողներին, խոսել էր իր հետ պատահած տհաճ դեպքի մասին՝ մասնավորապես պատմելով, որ ինքն անձամբ օրեր առաջ ժամկետն անց երշիկ է հայտնաբերել Երևանի խանութներից մեկում: Իսկ լրագրողների այն հարցին, թե այդ որ խանութն է եղել, բանախոսը պատասխանել է. «Երևան սիթի»-ում էր դա»:

Մանրամասնելով իր խոսքը՝ Չիլինգարյանը հավելել է. «Երշիկը սպիտակած էր, ես ասացի մենեջերին այդ մասին, անմիջապես դա հանվեց վաճառքից»: Այսինքն՝ եթե գնորդը չցուցաբերեր քաղաքացիական հասարակության ներկայացուցչին հարիր վարքագիծ ու իր բողոքը չհայտներ մենեջերին, ուրեմն՝ այդ երշիկը շարունակելու էր տաղավարում բորբոսնե՞լ, ի՞նչ է: Իսկ եթե նրա փոխարեն մի թոշակառու ծեր կին լիներ գնորդը, ի՞նչ էր լինելու այդ պարագայում, կարո՞ղ է մեզ որևէ մեկը պատասխանել…

Բայց խնդրում եմ ուշադրությո՛ւն դարձրեք մի ուշագրավ հանգամանքի վրա. ապրանքն այդ անմիջապես հանվել է վաճառքից՝ բողոքը ստանալուց հետո: Համաձայնե՛ք, որ սա «իրական առաջընթաց» կարելի է համարել մեր առօրյա պրակտիկայում, քանի որ իրականության մեջ քիչ չեն դեպքերը, երբ բողոքներն այդպես էլ անարձագանք են մնում: Հետո էլ ասում եք՝ ոչինչ այս երկրում չի փոխվում, տեսնո՞ւմ եք՝ ինչպիսի հսկայական քայլերով ենք առաջ ընթանում. նույնիսկ պարտաճանաչ եվրոպացիները կնախանձեին:

Չնայած մամուլում պարբերաբար հրապարակվող հոդվածներին ու նյութերին՝ կապված Հայաստանում վաճառվող սննդամթերքի պատշաճ որակի հետ, երկրում այս ուղղությամբ կարծես ոչինչ էլ չի փոխվում, եղած խնդիրներն էլ օրեցօր է՛լ ավելի են խորանում՝ շատ հաճախ անուշադրության մատնված լինելով նույն պետության կողմից:

Դավիթ Բաբանով