Ճշմարիտյանի «բանը բո՞ւրդ» է

Պարզվում է՝ այս նոր տարին ոմանց համար կարող է այնքան էլ երազանքների իրականացման տարի չլինել: Չար լեզուներն ասում են, որ նախարարներից մեկի՝ Էկոնոմիկայի նախարար Կարեն ճշմարիտյանի գործերն այնքան էլ լավ չեն ընթանում: Բանը հասել է նրան, որ վերջինս սկսել է նույնիսկ խուսափել «չամուռ» լրագրողներից, որոնք, հետաքրքրությունից դրդված, հատկապես վերջին օրերին առիթը բաց չեն թողնում՝ գեթ մեկ բառ պոկելու նախարարից, բայց նախարարին հաջողվում է ճողոպրել նրանց ճնշող ներկայությունից:

Թե հատկապես ինչի՞ հետ է կապված Ճշմարիտյանի նման պահվածքը, մնում է միայն ենթադրել, բայց ամենևին էլ չի բացառվում, որ մոտ ապագայում սույն պաշտոնյան հրաժեշտ տա իր աթոռին. որևէ մեկին պետք է, չէ՞, պատասխանատվության ենթարկել երկրում ստեղծված նման իրավիճակի համար: Բա Ճշմարիտյանից էլ հարմար թեկնածո՞ւ…

Անկախ նրանից, թե ինչպես կգնահատեք սույն նախարարի՝ պաշտոնավարման ընթացքում գրանցած օգտակար գործողության գործակիցը, համաձայնեք, որ այս անձը, գոնե իր մարդկային տեսակով, նախարարների ցուցակում ամենևին էլ առաջին հորիզոնականներում չպետք է որ լիներ, ում հանդեպ հարկ էր «պատժիչ գործողություններ» կիրառել՝արդարացնելու համար սեփական ֆիասկոն: Մենք, իհարկե, չենք կարող հաստատ ասել, թե կոնկրետ ինչի հետ է կապված Ճշմարիտյանի տարօրինակ վարքը, բայց լիովին բացառել վերոհիշյալ պատճառը ևս ոչ մի կերպ չի ստացվում, համաձայնե՛ք:

Բոլոր հարցերի պատասխանը թողնենք ժամանակին ու սպասենք, տեսնենք՝ ինչու է տխրել Կարեն Ճշմարիտյանը, բայց որ այս ամենից մի տեսակ վատ հոտ է գալիս, կարծում ենք, կհամաձայնեն ձեզանից շատերը:

Դավիթ Բաբանով