Դի Կապրիոն խոստովանել է, որ վերստին հուզվել է՝ իմանալով «Օսկարի» հերթական անվանակարգման մասին

Հոլիվուդյան հանրաճանաչ դերասան Լեոնարդո Դի Կապրիոն հայտնել է, թե «ուրախ է և հուզված» այն փաստից, որ արդեն վեցերորդ անգամ անվանակարգվել է «Օսկար» հեղինակավոր մրցանակի, թեև նախկինում իրեն ոչ մի անգամ չի հաջողվել հայտնվել դափնեկիրների թվում: Այս մասին, ինչպես տեղեկացնում է «Արմենպրես»-ը, նա հայտարարել է Լոնդոնում, ուր ժամանել է «Փրկվածը» (The Revenant) ֆիլմի բրիտանական պրեմիերային, որում խաղացած դերը կարող է 41-ամյա ամերիկացուն բաղձալի արձանիկի արժանացնել:

«Ես հուզված եմ, և իրոք հուզված եմ»,- ասել է Դի Կապրիոն՝ պատասխանելով Sky News հեռուստաալիքի այն հարցին, թե հերթական «Օսկարի» անվանակարգվելու լուրերը թեկուզ ինչ-որ հույզեր առաջացնում են արդյոք իր մեջ: «Նման կարգի ճանաչում ստանալը մեծ արժանիք է, հատկապես երբ դու այդքան լրջորեն ես վերաբերվում այն բանին, ինչով զբաղվում ես»,- հավելել է դերասանը: «Այդ կինոն («Փրկվածը») գրեթե մեկ տարի է խլել իմ կյանքից, իսկ Ալեխանդրոյից (ռեժիսոր Ինյարիտու) երեք կամ չորս տարի,- շարունակել է Դի Կապրիոն:- Այս ֆիլմում մենք արել ենք այն ամենն, ինչ կարող էինք՝ լիովին կենտրոնացած լինելով կինոնկարի հաջողության վրա», հաղորդել է ՏԱՍՍ-ը: