Լավ չեք աշխատում, տղաներ, լավ չեք գովազդում...

Մեր դարում պետական մակարդակով ապրանք գովազդելը գնալով դժվարանում է, որովհետև զուգահեռ դրա հակագովազդն է աշխատում: Օրինակ՝ առողջապահության նախարարությունը վերջին օրերին ակտիվ կերպով գովազդեց «Տամիֆլյու» դեղամիջոցը, նույնիսկ նախարարի կողմից կոչ արվեց չզբաղվել ինքնաբուժմամբ, այսինքն՝ գնել «Տամիֆլյու»՝ լուրեր տարածելով, որ այն դեղատներում վաճառվում է 20 հազար դրամով: Բայց պարզվում է՝ 20 հազար դրամով դեղը «բրթելն» այդքան էլ հեշտ չէ:

Ապա նախարարը փորձեց աշխատեցնել գովազդի հաջորդ տարբերակը՝ «զեղչային համակարգով»: Նա հայտարարեց, որ «Տամիֆյուն» դեղատներում կվաճառվի 11.500 դրամով: Կրկին թանկ է, բայց ոմանց համար միգուցե արդեն հասանելի կդառնա:

Բայց այս անգամ էլ «Տամիֆլյուի» վաճառքի գործին «խփող» եղավ. հայկական լրատվամիջոցներն էին, որտեղ արդեն հայտնվեցին հոդվածներ, որոնք ներկայացնում են, թե իրականում ինչ վնասներ կարող է տալ օրգանիզմին այդ դեղամիջոցը, նաև ասում, որ «Տամիֆլյուի» ազդեցությունն էլ առանձնապես չի տարբերվում սովորական ամենաէժան «Պարացետամոլի» ազդեցությունից: Իսկ «Պարացետամոլը» մատչելի դեղ է բոլորի համար: Այնպես որ՝ տեսնում եք՝ ցանկացած գովազդի դեմ հակագովազդ կարող է աշխատել, և եթե պետական մակարդակով դեղամիջոցի մեծաքանակ վաճառք էր պլանավորվել, ապա կարելի է ասել՝ գործարքը չհաջողվեց: Լավ չեք աշխատում, տղաներ, լավ չեք գովազդում...

Կարեն Վարդանյան