Վարդան Ջհանգիրյանի ներկայացուցիչ Վահե Հովսեփյանին սպառնացող ՕԵԿ-ականի գործը տեղափոխվել է Սևան

ՀՀ ԱԺ պատգամավորության թեկնածու, ՀԱԿ անդամ Վարդան Ջհանգիրյանի լիազոր ներկայացուցիչ Վահե Հովսեփյանի կողմից ներկայացված դիմումի քննարկմամբ պարզվել է, որ վերջինս հայցով դիմել է դատարան ՀՀ ԱԺ պատգամավորության թեկնածու ՀՀԿ անդամ Կարեն Բոթոյանի թեկնածությունն անվավեր համարելու համար: 27.04.2012 թ. ժամը 19:30-ի սահմաններում, Կ. Բոթոյանի լիազոր ներկայացուցիչ Համլետ Պապոյանը զանգահարել է Վ. Հովսեփյանին՝ վերջինիս հետ դատարան ներկայացրած հայցը քննարկելու և դրա անհիմն լինելը ապացուցելու համար: Հեռախոսազրույցի ընթացքում Հ.Պապոյանի ձեռքից հեռախոսը վերցրել է Կ. Բոթոյանի համակիր Սերգեյ Մանուկյանը և դատարան դիմելու համար ամոթանք և հայհոյանք է տվել Վ. Հովսեփյանի հասցեին:

Նկատի ունենալով, որ Վ.Հովսեփյանին զանգահարել են Սևան քաղաքից՝ Մալաթիա և Սեբաստիա վարչական շրջանի դատախազության ցուցումով նյութերը տարածքային ենթակայության կարգով 28.04.2012 թ. ուղարկվել են ոստիկանության Սևանի բաժին: Այդ մասին ասված է Ոստիկանության տարածած հաղորդագրությունում: 

Հիշեցնենք, որ դիմում-բողոքը ներկայացնելուց հետո Բոթոյանի համակիր Սերգեյ Մանուկյանը զանգահարել էր Վահե Հովսեփյանին և սպառնալիքներ տեղացել, ինչի մասին գրել էինք ավելի վաղ։