Ինչ ասել եմ, ասածներիս տերն եմ. Նաիրա Զոհրաբյանը՝ ԵԽԽՎ-ում տեղի ունեցած միջադեպի մասին

Այսօր մամուլում հրապարակվեց, որ Եվրոպայի խորհրդի խորհրդարանական վեհաժողովում (ԵԽԽՎ) Թուրքիայի պատվիրակությունը բողոք է ներկայացրել ԵԽԽՎ Բյուրո՝ հայաստանյան պատվիրակության անդամ Նաիրա Զոհրաբյանի պահվածքի հետ կապված:

Նշենք, որ հայազգի Մարգար Եսայանը ԵԽԽՎ ձմեռային նստաշրջանում «կողմ» էր քվեարկել բրիտանացի պատգամավոր Ռոբերտ Ուոլթերի «Բռնության աճը ԼՂ-ում և Ադրբեջանի մյուս գրավյալ տարածքներում» զեկույցին: Դրանից հետո Նաիրա Զոհրաբյանը մոտեցել էր Եսայանին և նախատել, թե ինչպես կարելի է հայ լինելով հանդերձ՝ նման խայտառակ զեկույցին կողմ քվեարկել:

ԼՈՒՐԵՐ.com-ի հետ զրույցում Նաիրա Զոհրաբյանը նշեց՝ իրեն բացարձակապես չի հետաքրքրում, թե ինչ է պատրաստվում անել թուրքահպատակ ԵԽԽՎ նախագահ Պեդրո Ագրամունտը: «Ենթադրելի էր, որ Մարգար Եսայանը և թուրքական պատվիրակությունն ինչ-որ գործընթաց սկսելու էին: Բայց դա ինձ բացարձակապես չի հետաքրքրում և մտահոգում: Ինչ ուզում են, թող անեն: Ես ինչ ասել եմ Մարգար Եսայանին, իմ ասածների տերն եմ, գտնում եմ՝ ինչ ասել եմ, ճիշտ եմ ասել, տեղին եմ ասել, մնացածի մասին ես հրաժարվում եմ խոսելուց կամ մեկնաբանելուց»,- ասաց Նաիրա Զոհրաբյանը:

Վերջինս չի կարծում, որ այս միջադեպը կարող է ազդել ԵԽԽՎ-ում հայաստանյան պատվիրակության աշխատանքի վրա: «Ինչո՞ւ պետք է ազդի: Ես որպես պատգամավոր ազգությամբ հայ պատգամավորին ընդամենն ասել եմ՝ ինչպե՞ս կարող է կողմ քվեարկել Ուոլթերի խայտառակ հակահայ զեկույցին: Դա պատվիրակության հետ ի՞նչ կապ ունի: Իմ նախաձեռնությունն է եղել: Ես նրան այդքանն ասել եմ ու դուրս եկել դահլիճից»,- մանրամասնեց Նաիրա Զոհրաբյանը:

Հիշեցնենք, որ Ռոբերտ Ուոլթերի՝ «Բռնության աճը ԼՂ-ում և Ադրբեջանի մյուս գրավյալ տարածքներում» հակահայկական զեկույցը ԵԽԽՎ ձմեռային նստաշրջանում, սակայն, չընդունվեց:

Քրիստինա Աղալարյան