Մխիթարյանի գոլերը հաղթանակի 100%-անոց երաշխիք են. Ruhr Nachrichten-ի անդրադարձը

Գերմանական Ruhr Nachrichten պարբերականն անդրադարձել է Հայաստանի ազգային հավաքականի և Դորտմունդի «Բորուսիայի» կիսապաշտպան Հենրիխ Մխիթարյանի կարևորությանը գերմանական ակումբում:

Պարբերականն անդրադառնալով Բունդեսլիգայի 21-րդ տուրի «Բորուսիա» - «Հանովեր» հանդիպմանը Մխիթարյանի ցուցադրած խաղին՝ գրել է.

«Հենրիխ Մխիթարյանն առջևում 50 մետր տարածություն ուներ: Խաղադաշտի կենտրոնում Մարկո Ռոյսից ստացալով գնդակը՝ նա առաջ նետվեց: Մխիթարյանը բավականաչափ ժամանակ ուներ գրոհի շարունակությունը որոշելու կամ երկմտելու համար, սակայն իրավիճակները, երբ ֆուտբոլիստի ոտքերը դողում էին, վաղուց անցյալում են: Մխիթարյանը խաղի 57-րդ րոպեին 20 մետրից գրավեց մրցակցի դարպասի ներքևի աջ անկյունը և հաղթանակ բերեց դորտմունդցիներին:  Մխիթարյանի այս գոլը ստեղծագործող ֆուտբոլիստի  առաջընթացի համար կարևոր  քայլ էր: Նախկինում նման դիրքերում ֆուտբոլիստը երկմտում էր կամ ավելի անհարմար դիրքերից հարվածներ էր կատարում, սակայն հիմա նա համբերատար է դարձել: Հենրիխն ավելի հավասարակշռված խաղ է ցուցադրում: Ընդ որում՝ միշտ չէ, որ հնարավոր է արդյունավետ խաղ ցուցադրել, հատկապես թիմերի դեմ, որոնց բոլոր 11 ֆուտբոլիսները մտածում են միայն հակառակորդի վտանգավոր գրոհները չեզոքացնելու մասին: Շնորհիվ «Հանովերի» դեմ խաղում հեղինակված գոլի՝ Մխիթարյանը 33 խաղում արդեն մասնակից է դարձել դորտմունդցիների 38 գոլի, ինչն արդյունավետության հիանալի ցուցանիշ է: Եվ միայն այն պատճառով, որ Մխիթարյանն ավելի «պայծառ» Օբամեյանգի ստվերում է (այդ թվում նաև հանդերձանքով և վարքով) և ավելի ինքնամփոփ ու համեստ է, նրա մասին ավելի քիչ են խոսում: Մխիթարյանի գոլերը հաղթանակի 100%-անոց երեշխիք են. դորտմունդցիները հաղթել են բոլոր 17 խաղերում, որոնցում կիսապաշտպանը գոլ է խփել: Մխիթարյանի գոլը «Հանովերի» դարպասին Բունդեսլիգայի ընթացիկ մրցաշրջանում դորտմունդցիների առաջին հեռահար հարվածից գոլն էր»,- գրում է պարբերականը: