Թբիլիսիի օդանավակայանը մառախուղի պատճառով չի կարողացել ընդունել տասը չվերթ, այդ թվում՝ Ստամբուլի չվերթը

Թբիլիսիի միջազգային օդանավակայանը թանձր մառախուղի պատճառով չի կարողացել ընդունել տասը չվերթ, այդ թվում՝ Ստամբուլի չվերթը, որով Վրաստան պետք է ժամաներ Թուրքիայի ԱԳ նախարար Մևլյութ Չավուշօղլուն: Այդ մասին, ինչպես տեղեկացնում է «Արմենպրես»-ը, փետրվարի 17-ին հայտնել է օդանավակայանի վարչակազմը:

«Չվերթերի մի մասը չեղյալ են հայտարարվել, առանձին դեպքերում հարկ է եղել օգտագործել հարևան երկրների՝ Հայաստանի և Ադրբեջանի օդանավակայանները: Մասնավորապես, չեղարկվել է «Թուրքական ավիաուղիների» երկու չվերթ, ինչպես նաև Pegasus-ի և Atlas global-ի չվերթերը: Կիևից չվերթը տեղափոխվել է… Ուշացումով կկատարվի Մոսկվայից չվերթը: Fly Dubai-ի ինքնաթիռը վայրէջք կկատարի Երևանում, նաև չի հաջողվել ընդունել Չինաստանից մեկնած ինքնաթիռը, որը վայրէջք է կատարել Բաքվում»,- հայտնել են Թբիլիսիի օդանավակայանի վարչակազմում:

Թուրքիայի դեսպան Զեքի Լևենթ Գումրուքչուն նշել է, որ Ստամբուլից Թբիլիսի պետք է ժամաներ Թուրքիայի ԱԳ նախարարը, «սակայն չվերթը չի իրականացվել անբարենպաստ եղանակի պատճառով»:

Նախօրյակին չկատարված բոլոր չվերթերը կիրականացվեն փետրվարի 17-ին: Վրաստանի մայրաքաղաքում մառախուղն աստիճանաբար ցրվում է, հաղորդել է ՌԻԱ Նովոստին: