Իսրայելի խորհրդարանում նախկին արտգործնախարար Լիբերմանին «Ադրբեջանի լրտես» են անվանել

Այսօր Իսրայելի խորհրդարանում (Կնեսետ) «Մեր տունը Իսրայելն է» կուսակցության ներկայացրած «Արտասահմանյան գործակալների մասին» օրենքի նախագծի քննարկման ժամանակ սկանդալ է տեղի ունեցել:

Ինչպես հաղորդում է «Արմենպրես»-ը' վկայակոչելով իսրայելական ԶԼՄ-ները, օրինագծի քննարկման ժամանակ ձախամետ MERETZ կուսակցության առաջնորդ Զաավա Գալյոնը Իսրայելի ԱԳՆ-ի նախկին ղեկավար, «Մեր տունն Իսրաելն է» կուսակցության խմբակցության ղեկավար Ավիգդոր Լիբերմանին անվանել է «Ադրբեջանի լրտես»:

«Մեր տունն Իսրայելն է» խմբակցության անդամ Ռոբերտ Իլատովի հեղինակած օրինագծում առաջարկվում է «արտասահմանյան գործակալներ» ճանաչել այն կազմակերպություններին եւ առանձին անձանց, որոնք ֆինանսավորում են ստանում արտասահմանից եւ առաջ են տանում արտասահմանյան պետությունների շահերը: Այդ օրինագիծը հանդիսանում է ոչ կառավարական կազմակերպությունների ֆինանսավորման «թափանցիկության» մասին օրենքի տրամաբանական շարունակությունը, որն անցյալ շաբաթ առաջին ընթերցմամբ հաստատել էր Կնեսետը:

Քննադատելով օրինագիծը՝ Զաավա Գալյոնը հայտարարել է, որ այն առաջարկողներն իրենք են արտասահման գործակալներ, այն էլ' Ադրբեջանի կառավարության գործակալներ:

«Ես Կնեսետի իմ ընկերներին ուզում եմ ասել, որ արտասահմանյան գործակալների մասին այս օրինագիծն առաջին հերթին պետք է վերաբերվի Ռոբերտ Իլատովին եւ նրա «Մեր տունն Իսրայելն է» կուսակցության առաջնորդ Ավիգդոր Լիբերմանին: Դուք արտասահմանյան գործակալներ ենք…ինձ ուշադիր լսեք…ադրբեջանցիների գործակալը: Իսրայելում Ադրբեջանի կառավարության լրտեսներ: Դուք նրանցից ապօրինի օգնություն եք ստանում: Դուք կազմակերպություն եք ստեղծել եւ նրա միջոցով փող եք վերցնում», -ամբիոնից ասել է Զաավա Գալյոնը:

Ադրբեջանից որպես փող ստացող կառույց Գալյոնը նշել է Ադրբեջան-Իսրայել բարեկամական միությունը' AzIz-ը: Նրա խոսքով' այդ կազմակերպությունը ֆինանսավորվում է Ադրբեջանի կառավարության կողմից եւ ծառայում է Լիբերմանի կուսակցությանը:

«Այժմ նման մարդիկ արտասահմանյան գործակալների մասին օրենք են ցանկանում ընդունել տալ», -ասել է Զաավա Գալյոնը:

«Դուք կասեցնում ենք Հայոց ցեղասպանության ճանաչումը խորհրդարանում, քանի որ Ադրբեջանի գործակալն եք: Սրանից հետո ինչպե՞ս կարող եք հասարակական կազմակերպություններում «թափանցիկություն» պահանջել», -դիմելով Լիբերմանին՝ ասել է Գալյոնը:

Հետո նա Ադրբեջանի պետական նավթային ընկերության' SOCAR-ի կողմից կազմակերպված համաժողովում որպես արտգործնախարար Լիբերմանի մասնակցությունն անվանել է «կոմպրոմատ» եւ «շոկ փաստ»' հավելելով, որ Լիբերմանը հովանավորել է Իսրայելի ափերում նավթի որոնումներ իրականացնող Caspian Drilling Company -ին, որը հանդիսանում է SOCAR-ի դուստր ընկերությունը:

Բուռն վիճաբանություններից հետո օրինագիծը վերամշակման համար ուղարկվել է Կնեսետի օրենսդրական հանձնաժողով: