Ի՞նչ հիմնավորմամբ ՍԴ-ն մերժեց Միասնական շտաբի հայցադիմումը

Այսօր ՍԴ-ն մերժեց Միասնական շտաբի հայցադիմումը: Միասնական շտաբի փաստաբան Վահե Գրիգորյանը լրագրողների հետ զրույցում հիմնավորեց ՍԴ այդ որոշումը՝ նշելով, որ ՍԴ-ն իր որոշումը կայացրել է՝ հիմնականում հենվելով Վենետիկի հանձնաժողովի Եվրոպայի խորհրդի որոշման դիրքորոշումների վրա:

«Մեր դիմումը մերժվեց։ Մեր նպատակն էր հասնել ընտրողների ցուցակների ընդհանուր հրապարակմանը, ինչը մենք հիմնավորում էինք այն փաստարկով, որ Սահմանադրության 2-րդ հոդվածով նախատեսված է, որ ժողովրդի կողմից իր իշխանության իրականացման փաստն ապացուցող առաջնային փաստաթուղթը պետք է հրապարակային լինի: Դատարանը մերժեց փաստարկը և, փաստորեն, մեր դիմումը: Այնուամենայնիվ, ՍԴ-ի կողմից հստակություն մտցվեց ընտրական օրենսգրքի մեր կողմից վիճարկվող նորմերի, մասնավորապես՝ ընտրողների կողմից ստորագրված ցուցակների չհրապարակման կամ հրապարակման սահմանափակման իրավակիրառ պրակտիկայում դրանք կիրառելու հարցում, այսինքն՝ այլ խոսքերով ընտրական հանձնաժողովները և պետական այլ մարմինների պաշտոնատար անձինք, փաստորեն, ավելի սահմանափակ են այդ նորմերը ընդհանրական մեկնաբանելու, ընդհուպ մինչև այդ ցուցակները ընտրական գործընթացների մասնակիցներին անհասանելի դարձնելը: Այս իմաստով սա շատ դրական առաջընթաց է, այնուամենայնիվ, ամեն ինչ կախված է մնում ՍԴ-ի որոշումից՝ արտահայտված իրավական դիրքորոշման իրավակիրառ պրակտիկայում, պրակտիկայում կիրառումից՝ ընտրական հանձնաժողովների կողմից, դատարանների կողմից, այլ պետական մարմինների պաշտոնատար անձանց կողմից, այինքն՝ սա ՍԴ-ի որոշումն է և, եթե դրանում կա որոշ դրական էլեմենտներ, իսկ այդ դրական էլեմենտը հստակությունն էր, փաստորեն այլևս բացառվում է այդ ցուցակները 11 հոդվածի առաջին մասի կատեգորիկ ձևակերպմամբ չհրապարակելը, թեկուզ և դրանք հրապարակվելու են սահմանափակ թվով անձանց կողմից և սահմանափակ դեպքերում և պայմաններում», - նշեց Վահե Գրիգորյանը:

Խոսելով ՍԴ-ի որոշման վերաբերյալ սպասելիքների մասին՝ Գրիգորյանն ասաց, որ իրենք հույս ունեին, որ Սահմանադրության երկրորդ հոդվածի հիման վրա բերված իրենց փաստարկները հիմք կընդունվեն և ի վերջո Հայաստանում կհրապարակվեն այդ ցուցակներն առանց որևէ սահմանափակման: