Թվանկարչություն կամ ո՞ւմ հաշվին է ավելացել ընտրողների ընդհանուր թիվը

Police.am կայքում ընտրություններից առաջ զետեղված' ընտրողների ընդհանուր թվին վերաբերող վերջին հաղորդագրության համաձայն' ընտրողների ընդհանուր թիվը կազմում է 2.484.003 մարդ (լրացուցիչ ցուցակում ընդգրկված ընտրողները' ներառյալ), այնինչ արդեն ընտրությունների ավարտից հետո elections.am-ում զետեղված «ԱԺ պատգամավորների համամասնական ընտրակարգով ընտրությունների նախնական արդյունքների արձանագրություն» փաստաթղթում ընտրողների ընդհանուր թիվ է նշված 2.524.960-ը։ Երկու թվերի միջև տարբերությունը կազմում է 40.957։

Փորձենք հասկանալ, թե ինչպես է ստացվել, որ ընտրողների ընդհանուր թիվը մի քանի օրվա ընթացքում նմանատիպ վայրիվերումների է ենթարկվել։

Ոստիկանության վերջին հայտարարությունում բոլոր լրացուցիչ ցուցակներում ընդգրկված ընտրողների ընդհանուր թիվը կազմում է 19.451, իսկ ԿԸՀ երեկ հրապարակած արձանագրության համաձայն' 24.560։ Այսինքն' ԿԸՀ աևձանագրությունում ընտրողների հիմնական ցուցակների ընտրողների թիվը կազմում է 2.500.400, իսկ ոստիկանության հայտարարության համաձայն' 2.464.552։ Ստացվում է, որ մի քանի օրվա ընթացքում հիմնական ցուցակների ընտրողների թիվը աճել է ոչ ավել, ոչ պակաս' 35.848-ով։

Այնինչ, հաշվի առնելով մեծամասնական թեկնածուների և ընտրություններին մասնակցող քաղաքական ուժերի ահազանգն ընտրացուցակներում առկա մահացած և այլևս ՀՀ քաղաքացի չհանդիսացող անձանց մասին, մեկ հարյուրից ավել նույն անունով մարդու (սա ոստիկանությունը տեխնիկական վրիպում անվանեց և շտկեց) և այլնի մասին, ոստիկանության հավաստիացումը ցուցակները «մաքրելու» մասին, այդ թիվը ոչ թե պետք է աճեր, այլ' նվազեր։

Հարցի առնչությամբ Լուրեր.com-ը փորձեց պարզաբանում ստանալ Կենտրոնական ընտրական հանձնաժողովից և Ոստիկանության անձնագրերի և վիզաների վարչությունից, սակայն ապարդյուն։ ԿԸՀ-ից մեր հարցին ի պատասխան միայն ասացին, որ հիմք ընդունենք երեկ հրապարակված և ԿԸՀ կայքում զետեղված Արձանագրության թիվը, իսկ Ոստիկանության անձնագրերի ու վիզաների վարչության հեռախոսահամարը համառորեն լռում է։

Խորեն Տեր-Մկրտչյան