Թուրքիայում նոր ահաբեկչություն է գրանցվել. կան զոհեր և վիրավորներ

Ստամբուլի կենտրոնում հունիսի 7-ին տեղի ունեցած պայթյունից հետո հունիսի 8-ին մեկ այլ խոշոր պայթյուն է գրանցվել Թուրքիայի հարավային Մարդին նահանգի Միդյաթ գավառում: Թուրքական «Հյուրիեթ» պարբերականը հայտնում է, որ մահապարտ ահաբեկիչը պայթուցիկով զինված մեքենայով փորձել է մտնել անվտանգության վարչության շենք, սակայն բախվել է բետոնե պատին և պայթել: Հաղորդվում է, որ ավտոմեքենայի մեջ եղել է 500 կգ պայթուցիկ:

Թուրքիայի վարչապետ Բինալի Յըլդըրըրմը հայտարարել է, որ Միդյաթի ամենամարդաշատ վայրերից մեկում իրականացված պայթյունի հետևանքով զոհվել է 1 ոստիկան և 2 քաղաքացիական անձ, ավելի քան 30 մարդ վիրավոր է: Յըլդըրըմը հայտարարել է, որ կատարվածի պատասխանատուն Քրդական բանվորական կուսակցությունն (PKK) է:

Պայթյունի ուժգնությունից վնասվել են հարակից մեքենաները:

Հիշեցնենք, որ հունիսի 7-ի առավոտյան պայթյուն է որոտացել Ստամբուլի մետրոյի Վեզիջիլեր կայարանի մոտակայքում: Ըստ նախնական տվյալների' ոստիկանական մեքենայի անցնելու ժամանակ հեռակառավարման միջոցով պայթեցվել է կայանած մեքենան: Պայթյունի հետևանքով մահացել է 11 մարդ' 7 ոստիկան և 4 քաղաքացիական անձ: 36 մարդ վիրավոր է, ընդ որում, նրանցից 3-ի վիճակը ծանր է: Վնասվել են հարակից շինություններն ու ավտոմեքենաները:

Հաղորդվում է, որ պայթյունից հետո լսվել են կրակոցներ: Նախնական տվյալներով՝ պայթյունը ահաբեկչական հարձակման հետևանք է եղել: Թուրքական իրավապահ մարմինները դեպքի վայրում անվտանգության լայնամասշտաբ միջոցներ են ձեռնարկել: