ԻԼԻՊ-ի ուժեղ կողմը կանայք են ճանաչվել

Մայամիի համալսարանի հետազոտողները հանգել են այն եզրակացության, որ կանայք կարևոր դեր են խաղում «Իսլամական պետություն» կազմակերպության անդամների միջև կապեր ապահովելու տեսակետից, նաև նպաստում են սոցցանցերում քարոզչական նյութերի տարածմանը, հայտնում է Lenta–ն:

Ի տարբերություն տղամարդկանց, որոնք գրոհայիններ են և ակտիվորեն հավաքագրվում են, կանայք հաճախ դիտարկվում են որպես քարոզչության և թյուր տեղեկատվության զոհ: Հենց այդ պատճառով ահաբեկչության դեմ պայքարի ավանդական մոտեցումները ամենից հաճախ ուղղված են արմատական կազմակերպությունների արական սեռի անդամների ոչնչացմանը:

Հետազոտողները վերլուծել են «ՎԿոնտակտե» սոցցանցի օգտատերերի միջեւ հաղորդակցության կառուցվածքը: Նրանք մի քանի պատճառներով են ընտրել այդ կայքը: Նախ այդտեղ ահաբեկչական խմբերին սատարող էջերը նույնքան արագ ու արդյունավետ չեն արգելափակվում, որքան Facebook–ում: Երկրորդ՝ «Վկոնտակտե»-ն Եվրոպայում խոշորագույն սոցցանց է՝ 360 մլն օգտատերերով: Երրորդ՝ դրանից օգտվողներից շատերը ապրում են ԻՊ վերահսկողության տակ գտնվող տարածքներում:

Նախ գիտնականներն ընտրել են ահաբեկչական կազմակերպության գործունեության հետ կապված հաճախ հանդիպող հիմնական բառերը, օրինակ՝ «խալիֆայություն», և դրանց միջոցով պարզել միավորումները, որոնցում օգտատերերն աջակցություն են հայտնել ԻԼԻՊ-ին: Այնուհետև գիտնականները վերլուծել են կապերն առանձին օգտատերերի միջև, որոնք այդ սոցիալական խմբերի անդամ են՝ հետևելով ամենօրյա փոփոխություններին: Եթե երկու մարդ նույն միավորման անդամ են, նրանք ներկայանում են գրաֆիկի երկու կապված հանգույցների տեսքով: Վերջնական սխեման բաղկացած է եղել ավելի քան 41 հազար մարդուց (մոտ 25 հազար տղամարդ և 17 հազար կին) և նրանց միջև 1 մլն կապից:

Վիճակագրական վերլուծության արդյունքները ցույց են տվել, որ կանայք՝ չնայած ԻԼԻՊ-ի շարքերում իրենց համեմատական փոքր թվաքանակին, կարեւոր դեր են կատարում քարոզչական նյութերի տարածման՝ այդ թվում թեստերի, աուդիո ու վիդեո նյութերի տարածման հարցում: Նրանք նաև պահպանում են համայնքների միջև կապերը ու նպաստում, որ ահաբեկիչներին աջակցող համայնքները համալրվեն նոր մասնակիցներով: