Երեխաների սնուցման համաշխարհային 18-րդ ֆորումը կանցկացվի Երևանում

2016 թվականի սեպտեմբերի 5-9-ը Երևանում կայանալու է Երեխաների սնուցման համաշխարհային 18-րդ ֆորումը: ՀՀ կառավարության որոշմամբ ֆորումին մասնակցելու նպատակով Հայաստանի Հանրապետություն ժամանող պատվիրակության անդամ հանդիսացող օտարերկրյա քաղաքացիները կազատվեն մուտքի արտոնագրի տրամադրման համար նախատեսված պետական տուրքի վճարումից:

ՀՀ կրթության և գիտության նախարար Լևոն Մկրտչյանը հիշեցրեց, որ ՄԱԿ-ի Պարենի համաշխարհային ծրագիրը ՀՀ կառավարության հետ համագործակցության շրջանակներում 2010 թվականից Հայաստանում իրականացնում է «Դպրոցական սնունդ» զարգացման ծրագիրը, որի ընթացքում Հայաստանն արձանագրել է դրական արդյունքներ: «Ներկայում տասը մարզերի մոտ 83 հազար երեխա ստանում է դպրոցական սնունդ, ընդ որում՝ երեք մարզում' Արարատում, Վայոց Ձորում և Սյունիքում, սնուցումն իրականացվում է ՀՀ կառավարության ֆինանսավորմամբ: Հաշվի առնելով ՄԱԿ-ի ՊՀԾ և միջազգային այլ կառույցների դրական արձագանքները' ՀՀ կրթության և գիտության նախարարությունը դիմել է Երեխաների սնուցման համաշխարհային հիմնադրամին՝ առաջարկելով 2016 թվականին նախատեսված Երեխաների սնուցման համաշխարհային 18-րդ ֆորումն անցկացնել Հայաստանում: Նախորդ տարիներին ֆորումներն անցկացվել են ԱՄՆ-ում, Գանայում, Հարավային Աֆրիկայում, Քենիայում,Եթովպիայում և Բրազիլիայում»,- ասաց Մկրտչյանը:

Ակնկալվում է, որ ֆորումին կմասնակցեն 200-250 հյուրեր 40 երկրներից, այդ թվում' նախարարներ և բարձրաստիճան այլ պաշտոնյաներ:Ֆորումի աշխատանքների ընթացքում նախատեսվում է այցելություններ դպրոցներ, ծանոթացում դպրոցական սննդի հայաստանյան փորձին, ինչպես նաև միջազգային փորձի փոխանակում: