Տավուշի մարզի բնակիչ է անհայտ կորել. նրան փնտրում են օգոստոսի 10-ից

Հասարակություն 13 Օգոստոս, 2016 19:01

Տավուշի մարզի բնակիչ է անհայտ կորել. օգոստոսի 10-ից նրա որոնման աշխատանքներում ներգրավված են ինչպես փրկարարներ և իրավապահներ, այնպես էլ տեղի բնակիչները:

Ինչպես տեղեկացնում են ՀՀ արտակարգ իրավիճակների նախարարությունից, օգոստոսի 10-ին՝ ժամը 08.31-ին, ահազանգ է ստացվել, որ Տավուշի մարզի Գանձաքար գյուղի բնակիչ 80-ամյա Ս. Զ.-ն օգոստոսի 8-ին՝ ժամը 12:00-ի սահմանում, տանից դուրս է եկել և չի վերադարձել. անհրաժեշտ է փրկարարների օգնությունը: Դեպքի վայր է մեկնել հրշեջ-փրկարարական ջոկատի օպերատիվ խումբը: Պարզվել է, որ Ս. Զ.-ին (ծնվ. 1938թ.) վերջին անգամ տեսել են «Տլոտ» կոչվող հանդամասի հարակից հատվածում: Հրշեջ-փրկարարները «Տլոտ» կոչվող հանդամասից մինչև «Մուրղուզ» կոչվող լեռ, «Աշնան ծուռթ», «Կանաչ գյոլ» և «Սանդի ուրթ» կոչվող հանդամասերը (մոտ 40 կմ շառավղով) իրականացրել են որոնողական աշխատանքներ: Որոնողական աշխատանքներին մասնակցել են ոստիկանության 3 աշխատակից և տեղի 30 բնակիչ: Մթության և անբարենպաստ եղանակային պայմաններից ելնելով՝ ժամը 20.35-ին դադարեցվել են Ս. Զ.-ի որոնողական աշխատանքները:

Օգոստոսի 11-ին, ժամը 11.53-ին Ս. Զ.-ի որոնողական աշխատանքները վերսկսվել են: Ժամը 20.10-ին մթության պատճառով որոնողական աշխատանքները դադարեցվել են:

Օգոստոսի 12-ին, ժամը 09.30-ին Գանձաքար գյուղում կորած Ս. Զ.-ի որոնողական աշխատանքները շարունակելու նպատակով դեպքի վայր է մեկնել Իջևանի հրշեջ-փրկարարական ջոկատի օպերատիվ խումբը: Ժամը 11.45-ին փրկարարները վերսկսել են որոնողական աշխատանքները, որոնց մասնակցել են 4 փրկարար, ոստիկանության 4 աշխատակից և տեղի 40 բնակիչ: Հրշեջ-փրկարարները «Տլոտ» կոչվող հանդամասից մինչև «Նովի ուռթ» սարը, «Խոզի ուռթ», «Կանաչ գյոլ» և «Սանդի ուրթ» կոչվող հանդամասերում մոտ 50 կմ շառավղով իրականացրել են որոնողական աշխատանքներ: Ժամը 20.12-ին մթության պատճառով որոնողական աշխատանքները դադարեցվել են:

Օգոստոսի 13-ին, ժամը 10.00-ին Ս. Զ.-ի որոնողական աշխատանքները վերսկսվելու նպատակով դեպքի վայր է մեկնել հրշեջ-փրկարարական ջոկատի օպերատիվ խումբը: Որոնողական աշխատանքները սկսվել են ժամը 13.10-ին: Աշխատանքներին մասնակցում են 10 փրկարար, ոստիկանության 4 աշխատակից և տեղի 50 բնակիչ: