Ինչպե՞ս մատաղ անել

qahana.am-ը գրում է.«Մատաղը ողորմություն է, որը նախատեսված է աղքատներին ու կարոտյալներին բաժանելու համար:

«Ով պատվում է Աստծուն, նա ողորմում է աղքատին» Առակ. 14:31
«Եղեք գթասիրտ, ինչպես որ գթասիրտ է ձեր երկնավոր Հայրը» Ղուկ. 6:36
«Երանի նրան, որ խնամում է աղքատին, որովհետև դատաստանի օրը Տերը կփրկի նրան անսահման չարից» Առակ 14:21-22
«Ողորմածությունը բարձրագլուխ պարծենում է դատաստանի դիմաց»: Հակ. 2:13

Սուրբ Սահակ Պարթև Հայրապետի կանոնում գրված է, որ սուրբ Գրիգոր Լուսավորիչը հայոց ամբողջական դարձից հետո սահմանեց, որ անբան կենդանիներին, կուռքերին զոհեր մատուցելու փոխարեն, որպես ողորմություն բաժանեն աղքատներին:

Սուրբ Ներսես Շնորհալի Հայրապետը նշում է, որ սուրբ Գրիգոր Լուսավորչի ժամանակներից սկսած՝ մատաղ էին անում Տիրոջ Հարության Տոնին, Տերունական և Սրբոց տոներին, ննջեցյալների հիշատակի համար և որպես հոգեհաց բաժանում կարոտյալներին:

Ըստ Գրիգոր Տաթևացու, մատաղ նշանակում է «աղ մատուցել»:

Հաճախ անտեղյակ մարդկանց կողմից մատաղն այսօր նույնացվում է հին կտակարանյան զոհաբերության հետ, որը ճիշտ չէ: Այս զոհերն ընդունելի էին մինչև Աստծու Գառի՝ Հիսուս Քրիստոսի, խաչի վրա պատարագվելը: Քրիստոսի զոհաբերությունից հետո կենդանիների զոհաբերությունները քրիստոնեության մեջ այլևս մերժելի են, ինչպես արեգակի ծագումից հետո ճրագի լույսը: Ուստի ակնհայտ է, որ մատաղը զոհաբերություն համարողը մերժում է Քրիստոսի արյամբ մեղքերից ազատագրվելը՝ փրկագործության խորհուրդը: Մատաղը մեղքերի թողության համար չէ, այլ ողորմության դրսևորման մի կերպ' հանուն աղքատների:

Մատաղի արարողակարգի համաձայն՝ քահանան, սաղմոսներ և աղոթքներ կարդալով, խաչով օրհնում է աղը, որը տալիս են կենդանուն ուտելու, որպեսզի այն սրբվի աստվածային անեծքից (Ծնն.3)՝ վերստանա առաջին օրհնությունը (Ծնն. 1:22), ապա մորթում են, եփում և բաժանում աղքատներին ու կարիքավորներին: Մատաղի համար կենդանին եկեղեցի չի կարելի տանել: Օրհնվում է միայն աղը:
Աղը մաքրության և անապականության օրինակ է, ինչպես Քրիստոս իր աշակերտներին է ասում. «Դուք եք երկրի աղը» Մատթ. 5:13:

Մատաղն առաջին հերթին բարեգործություն է, ողորմության ու գթասրտության պտուղ և ոչ թե խնջույքի կամ գինարբուքի առիթ»:

Առավել մանրամասն՝ սկզբնաղբյուր կայքում: