Քառօրյա պատերազմը դասեր քաղելու հիմք է հանդիսացել. Սեյրան Օհանյան

Բանակում իրականացվող յուրաքանչյուր միջոցառում՝ հատկապես մարտական գործողությունները, հիմք են հանդիսանում դրանցից դասեր քաղելու համար: «Բազե-2016» համահայկական երիտասարդական հավաքի մասնակիցների հետ հանդիպմանն այս մասին ասաց ՀՀ պաշտպանության նախարար Սեյրան Օհանյանը՝ պատասխանելով մասնակիցներից մեկի հարցին՝ Հայաստանն ի՞նչ դասեր է քաղե լ ապրիլյան քառօրյա պատերազմից և որո՞նք են եղել բանակի թերություններն այդ օրերին: «Առաջին հերթին այդ գործողությունների պլանավորման ընթացքում մենք նշում ենք հակառակորդի և մեր դրական և բացասական կողմերը, դրա վրա տեղավորում ենք այն առաջարկներն ու ծրագրերը, որոնք հիմք են հանդիսանում մարտական գործողությունների պլանավորման և գործնականում դրանց իրականացման համար: Այս առումով քառօրյա այս մարտական գործողություններն էլ դասեր քաղելու հիմք են հանդիսացել»,- նշեց Օհանյանը:

Անդրադառնալով դրական կողմերին՝ նախարարն ընդգծեց, որ, ի վերջո, իրենք եկել են այն եզրակացության, որ հանրապետության զինված ուժերի ներկայիս զարգացման պլանը, որը հիմք ՝է երկու տարվա ընթացքում պաշտպանական ռազմավարության վերանայման, ուղիղ արտահայտությունն է այն ռազմական գործողությունների, որ եղել են քառօրյա պատերազմի ընթացքում: «Այսինքն, մեր զարգացման պլանը և դրա հիմքում ձևավորվող սպառազինության և ռազմական տեխնիկայի համալրման, արդիականացման պետական ծրագիրը մենք ճիշտ ենք կազմում»,- ասաց նախարարը:

Նա բարձր գնահատեց առաջնագծում կատարված ինժեներական աշխատանքները, որոնք թույլ են տալիս ժամանակակից դասական մարտ վարել հակառակորդի դեմ: «Բոլոր խրամատները, դիրքերը, հակատանկային փոսերը և տարբեր տիպի հիմնական պահեստային դիրքերը հնարավորություն են տալիս ժամանակակից մարտ վարել: Մենք հիմա նաև քայլեր ենք ձեռնարկում ժամանակակից գիշերային ջերմադիտարկման սարքեր ձեռք բերելու ուղղությամբ»,- նշեց Օհանյանը:

Նախարարը համազգային նշանակություն ունեցող դրական երևույթ է համարում հայ ազգի համախմբումը ապրիլյան քառօրյա պատերազմի օրերին: Նրա խոսքով՝ այդ օրերին ողջ հայությունն է աջակցել Արցախին, իսկ ռազմական առումով բազմաթիվ կամավորականներ են գնացել և կանգնել զինվորի կողքին:

Անդրադառնալով թերություններին՝ նախարարը նկատեց, որ մի քանի հատվածներում տվյալ հատվածների հրամանատարները և նրանց ենթակա ստորաբաժանումների որոշ դեպքերում ոչ ճիշտ շարժերն են եղել: «Բայց այսօր քննադատել հրամանատարներին, ասել՝ դու ճիշտ ես գործել կամ ճիշտ չես գործել, այդքան էլ ճիշտ չի լինի: Նրանք այդ պահին եղել են հոգեբանական ծանր վիճակում, թշնամու կրակի տակ, կյանքին սպառնացող վտանգ են զգացել: Երբ նման ճնշում է լինում, պաշտպանվող կողմը ստիպված է լինում փոխել դիրքը, անցնել շրջանաձև պաշտպանության, աջից վտանգ զգալով՝ ձախ տեղափոխվել կամ հա կառակը: Եթե այդ դիրքերում, օրինակ, կապիտանի, լեյտենանտի կամ սերժանտի փոխարեն կոչումով մարշալ լիներ, դժվար է ասել՝ այդ պահին մարշալը ճիշտ որոշում կկայացներ, թե, օրինակ, երիտասարդ սերժանտը»,- եզրափակեց Օհանյանը: