Հայկական երկու պետությունները կրկին վերամիավորվել են ինչպես երկու ժայռեր

Ազգային Ժողովի պատգամավոր Վահե Էնֆիաջյանը ֆեյսբուքյան իր էջում գրել է.

Ազատ Արցախը ողջունում է բոլորին.

Յուրաքանչյուր անգամ այցելելով Արցախ, հպարտ եմ, որ ապրում ենք այն ժամանակաշրջանում, երբ յուրաքանչյուրս մեր ներդրումն ենք ունենում ազատ Արցախի կայացման ու հզորացման գործում: 1991 թվականի սեպտեմբերի 2-ին այն ամրագրեց իր ազատ և անկախ ապրելու վճռականությունը և արդեն 25 տարի է ունի ինքնիշխան պետականություն: Այդ ամենին հնարավոր եղավ հասնել Արցախյան Ազատագրական պայքարում մարտնչած ու սեփական կյանքի գնով հայրենիքի համար հերոսաբար պայքարած ազատամարտիկների շնորհիվ: Ազատամարտիկներ, որոնց համար հայրենիքը սկսում էր սահմաններից և սեփական կյանքի գնով այն անառիկ պահելը հայրենասիրության լավագույն դրսևորում էր պատերազմական տարիներին: Աշխարհաքաղաքական հարթակում նման զարգացումները բոլորի սրտով չէին. առաջին հերթին ՝ մեր որոշ հարևանների, որոնք մեզ համար շարունակում են հարևան մնալ միայն քարտեզի վրա: 1988-ին զարթոնք ապրած համազգային շարժումը վերածվեց հարևան երկրի հետ պատերազմի և հաղթանակի ՝ պարգևելով մեզ Անկախ Արցախ:

Այսօր գտնվում եմ այստեղ և կրկին համոզվում, որ ամենամեծ արժեքը, որն ունի այս հողը, դա արցախցին է, իր մարտնչուն, անկոտրում, խելացի ու անչափ բարի տեսակով: Այսօր այսպիսի մարդիկ են ապրում այստեղ, ովքեր անկախ պատերազմական անցյալ տարիների ու հետևանքների, անկախ կորուստների և ապրիլյան դեպքերի հավանական կրկնումների ապրում են այստեղ, աշխատում և իրենց անգնահատելի ներդրումն են ունենում այս պետության շարունակական կայացման ու հզորացման գործում: Հայկական երկու պետությունները կրկին վերամիավորվել են ինչպես երկու ժայռեր: Դա անհաղթահարելի ուժ է:

Շնորհավո՛ր տոնդ Արցախ Աշխարհ:

Շնորհավորում եմ բոլորիս Հայաստանում, Արցախում և Սփյուռքում: