Քանի դեռ ՀՀ նախագահը չի նկատել ու ասել` ախր, Հովիկ ջան, սիրուն չէ…

ՀՀ կառավարությունում ՊԵԿ-ի կամ նրա նախագահ Հովհաննես Հովսեփյանի հետ չունե՞ն, հակառակը`  առանձնակի, հովանավորչական վերաբերմո՞ւնք է, թե՞…

ՀՀ կառավարության կայքի «Առընթեր մարմիններ» բաժնից այսօր փորձեցինք այցելել ՀՀ կառավարությանն առընթեր պետական եկամուտների կոմիտեի կայք: Ի զարմանս մեզ, հայտնաբերեցինք, որ դա անհնար է, քանի որ կառավարության կայքի պատասխանատուները չեն բարեհաճել իրենց մոտ զետեղել ՊԵԿ-ի պաշտոնական կայքի հղումը, ավելին` չեն հրապարակել նաև ՊԵԿ-ի հասցեն, հեռախոսահամարը, էլեկտրոնային փոստի հասցեն: Չե՞ք հավատում… Համեցեք` տեսեք:

Մտածեցինք` գուցե կառավարությանն առընթեր մյուս մարմինների պարագայու՞մ էլ նույն կերպ են վարվել: Հատ-հատ բոլորինը (Ազգային անվտանգության ծառայություն, Անշարժ գույքի կադաստրի պետական կոմիտե, Հայաստանի Հանրապետության ոստիկանություն, Միջուկային անվտանգության կարգավորման պետական կոմիտե, Պետական գույքի կառավարման վարչություն, Քաղաքացիական ավիացիայի գլխավոր վարչություն) ստուգեցինք, չէ, բոլորի ամեն ինչն էլ տեղը տեղին նշված էր, միակ բացառությունը Պետական եկամուտների կոմիտեն կամ կոմիտեի էջն էր:
էստեղ մի գլուխկոտրուկ առաջացավ. լավ, բա Պետական եկամուտների կոմիտեի համապատասխան տվյալներն ինչո՞ւ չկան… Տնաշեններն ինչո՞ւ են զլացել հրապարակել, ի՞նչն է պատճառը` ՊԵԿ-ի համեմատաբար նորանշանակ նախագահ Հովհաննես Հովսեփյանի հետ չունե՞ն, բոլորը կարևոր են, ՊԵԿ-ը կարևոր չէ՞, կառավարության տեսանկյունից բոլորը պետք է թափանցիկ լինեն, բայց ո՞չ ՊԵԿ-ը… Թե՞ ՊԵԿ-ի կայք մտնողը տնտեսական ակտիվության նվազման, տրանսֆերտների կրճատման, կապիտալի արտահոսքի պարագայում այնտեղ տեղեկության հանդիպելով անցնող 8 ամիսների ընթացքում, նախորդ տարվա նույն ցուցանիշի համեմատ, մոտ 2 մլրդ դրամով հարկային հավաքագրումների գերազանցման մասին, կարող է հանկարծ վատանալ, հետևաբար ի՞նչ կարիք կա ակամայից մարդու ինֆարկտի կամ ինսուլտի պատճառ դառնալ, այսինքն`որտեղից ուզում են մտնեն, ինչպես ուզում են մտնեն ՊԵԿ-ի կայք, թող կառավարության կայքից չմտնեն:

ՊԵԿ-ի հեռախոսահամարը, հասցեն և էլեկտրոնային փոստի հասցեն չհրապարակելով էլ գուցե խնայե՞լ են նրան` իմանալով, թե բողոքները որքան շատ են, օրական մոտավորապես քանի մարդ է զանգահարելու, գնալու, էլ. փոստով բողոքի նամակ գրելու, մի խոսքով, «գժվեցնելու» պարոն Հովսեփյանի ղեկավարած այդ հաստատության աշխատակիցներին: Բա մեղք չե՞ն, հո օտար չե՞ն, ի վերջո, կառավարությանն առընթեր մարմնի աշխատակիցներ են, հետո՞ ինչ, որ այլ շենքում են նստած…

Չէ, այս ենթադրություններից ոչ մեկի հարցում էլ վստահ չենք, ՀՀ կառավարությունում այնպիսի բարդ մտածողության տեր մարդիկ կան, որ մեր երևակայությունը չի բավարարի նրանց մտքինը հասկանալու համար: Հը՞, գուցե ընթերցողնե՞րն օգնեն` հասկանալու, թե կառավարությունում ինչու են ջոկողություն դրել, կամ գուցե կառավարությունը հենց ինքն իր թանկագին ժամանակից մի փոքր հատկացնի, մի քանի տողանոց պարզաբանում գրի, բացատրի, թե բանն ինչումն է, քանի դեռ ՀՀ նախագահը չի նկատել ու ասել` ախր, Հովիկ ջան, սիրուն չէ…