ԱԱ-2018. Գերմանիան հաղթեց խոշոր հաշվով, Անգլիան հաղթանակ կորզեց վերջին րոպեներին

Ֆուտբոլի աշխարհի 2018թ. առաջնության որակավորման փուլի շրջանակում սեպտեմբերի 4-ին կայացել են մի շարք հանդիպումներ:

C խմբում ուժերը չափել են Ադրբեջանի և Սան Մարինոյի հավաքականները: Ադրբեջանը նվազագույն հաշվով առավելության է հասել մրցակցի նկատմամբ: Նույն խմբում Չեխիայի և Հյուսիսային Իռլանդիայի հավաքականների դիմակայությունն ավարտվել է 0-0 հաշվով, իսկ Գերմանիայի հավաքականը 3-0 հաշվով պարտության է մատնել Նորվեգիայի ազգային թիմին: Առաջին տուրից հետո մրցաշարային աղյուսակը C խմբում գլխավորում է Գերմանիայի հավաքականը, երկրորդ հորիզոնականում Ադրբեջանի հավաքականն է, մրցաշարային աղյուսակը 0 միավորով եզրափակում են Նորվեգիայի և Սան Մարինոյի հավաքականները:

E խմբում Հայաստանի հավաքականը մրցակցի հարկի տակ նվազագույն 1-0 հաշվով զիջել է դանիացիներին, Ռումինիայի և Մոնտենեգրոյի հավաքականների դիմակայությունն ավարտվել է 1-1 հաշվով, իսկ Ղազախստանի հավաքականը սեփական հարկի տակ 2-2 հաշվով է ավարտել հանդիպումը խմբի ֆավորիտ Լեհաստանի ազգային թիմի հետ խաղը: Առաջին տուրից հետո խմբի մրցաշարային աղյուսակը միանձնյա գլխավորում է Դանիայի հավաքականը: Մրցաշարային աղյուսակը 0 միավորով եզրափակում է Հայաստանի ազգային թիմը:

F խմբում Լիտվայի և Սլովենիայի հավաքականների դիմակայությունն ավարտվել է 2-2 հաշվով, Սլովակիան սեփական հարկի տակ նվազագույն հաշվով պարտվել է Անգլիայի ընտրանուն: Անգլիայի հավաքականը հաղթանակը կորզել է հանդիպման ավելացված ժամանակում, գոլի հեղինակ է դարձել Ադամ Լալանան: Մալթան սեփական հարկի տակ ջախջախիչ՝ 1-5 հաշվով պարտվել է Շոտլանդիայի հավաքականին: Խմբի մրցաշարային աղյուսակը գլխավորում է Շոտլանդիայի հավաքականը, երկրորդ հորիզոնականում Անգլիայի հավաքականն է, իսկ աղյուսակը եզրափակում է Մալթան: