Քառօրյա պատերազմի ժամանակ տունը կորցրած թալիշեցուն Արցախի իշխանությունները չեն օգնում (տեսանյութ)

Ապրիլին ադրբեջանական հրետակոծությունից հետո Թալիշ գյուղն ամբողջությամբ դատարկվեց։ Այսօր գյուղի միակ բնակիչն Արտակ Խաչատրյանն է, ում տունը, իր պատմելով, մնացել է ճանապարհից այն կողմ, այսինքն՝ ադրբեջանական հսկողության տակ։ Անկախ ամեն ինչից, նա շարունակում է ապրել Թալիշում, անգամ փոքրիկ խանութ ունի։ Իհարկե, հարց կառաջանա՝ ում համար է խանութը կամ ովքեր են առևտուր անում, եթե գյուղը դատարկվել է։ Խանութը հիմնականում ծառայում է բանակին, զինծառայողներին։ Թալիշեցին ամեն օր դիրքեր սնունդ, քաղցրեղեն, ջուր, ծխախոտ է բարձրացնում՝ դա համարելով իր սուրբ պարտականությունը։ 

Արտակն ապրում է իր խանութին կից գտնվող ինչ-որ վայրում, որտեղ կա միայն անկողին, աթոռ և սեղան։ «Դե աշխատում ենք մի կոպեկ, որ ընտանիք պահենք, էլի։ Տուն չունեմ, տունս ավիրվելուց բացի մնաց ճանապարհի այն կողմում, որ ուզեմ էլ՝ չեմ կարող գնալ»,- պատմեց նա։ Թալիշեցու ընտանիքը բնակվում է Ճարտար գյուղում։ 

Ա. Խաչատրյանը ԼՈՒՐԵՐ.com-ին պատմեց, որ դեռևս պատերազմից առաջ վարկ էր վերցրել, որն այսօր չի կարողանում փակել։ Ոչ մի կողմից օգնություն չի ստանում, բանկը չի ընդառաջում, Արցախի իշխանություններն էլ, մեղմ ասած, էշի ականջում քնած են, որևէ կերպ չեն օժանդակում։

Մանրամասները՝ ԼՈՒՐԵՐ.com-ի տեսանյութում։

Քրիստինա Աղալարյան, Արցախ