«Դպրոցական սնունդ» զարգացման ծրագիրը շուտով կիրականացվի նաեւ Տավուշի մարզում

«Դպրոցական սնունդ» զարգացման ծրագիրը շուտով կմեկնարկի նաեւ Տավուշի մարզում: Այս մասին լրագրողների հետ զրույցում հայտնեց ՀՀ կրթության եւ գիտության նախարար Լեւոն Մկրտչյանը:

2010 թվականից իրականացվող ծրագրի շրջանակում 10 մարզերի շուրջ 83.000 երեխա ստանում է դպրոցական սնունդ, այդ թվում' երեք մարզերում' Արարատում, Վայոց Ձորում եւ Սյունիքում այն իրականացվում է ՀՀ կառավարության ֆինանսավորմամբ:

«Ծրագրի նպատակն է ի վերջո հասնել նրան, որ ՀՀ բոլոր դպրոցների կրտսեր դասարաններում կարողանանք տաք սնունդ տրամադրել երեխաներին: Փորձելու ենք նաեւ աշխարհագրությունը մեծացնել, սակայն այն բավականին ծախսատար ծրագիր է: Եթե մենք կարողանանք սա անել, ապա կձեւավորենք համապատասխան ենթակառուցվածք: Անհրաժեշտ կլինեն համապատասխան պայմաններ, խոհանոց: Հաճախ դպրոցի տնօրենները չեն կարողանում փոխարինել սառը սնունդը տաք սննդով' վախենալով թունավորումներից, սննդի որակից: Սա է պատճառը, որ դեռեւս չենք շտապում, եւ այս հարցում մեր միջազգային գործընկերներ ի փորձը շատ օգտակար է»,-ընդգծեց ԿԳ նախարարը' տեղեկացնելով, որ Հայաստանում շուտով գործելու է հիմնադրամ, որը հնարավորություն կտա ներգրավելու միջազգային հովանավորներին:

Անդրադառնալով սեպտեմբերի 5-9 Հայաստանում կայանալիք «Երեխաների սնուցման համաշխարհային 18-րդ ֆորում»-ին՝ Լեւոն Մկրտչյանը նշեց, որ այն Հայաստանի համար կարեւոր է նաեւ քաղաքական տեսանկյունից:

«Առաջին անգամ մեզ համար ոչ շատ մոտ մայրցամաքից բարձրաստիճան պատվիրակություններ են ժամանել Հայաստան: Նրանց համար այս այցը նաեւ ճանաչողական նշանակություն ունի: Դպրոցական սնուցման տարաբնույթ փորձ կա այստեղ. կան երկրներ, որոնք սովի խնդիր ունեն, եւ կան այնպիսիները, որոնք ունեն որոշակի սննդային բավարարվածություն»,-ասաց նա:

Ֆորումի կազմակերպիչ «Երեխաների սնուցման համաշխարհային հիմնադրամ»-ի գործադիր տնօրեն Արլեն Միտչելը մեզ հետ զրույցում նշեց, որ 18-րդ ֆորումը թերեւս վերջին տարիներին անցկացված ֆորումներից ամենախոշորն է:

«Մենք կազմակերպում ենք ֆորումը ամեն տարի ամբողջ աշխարհով մեկ: Մենք շատ ենք սիրել Հայաստանը, սնունդը, մարդկանց: Իսկ այս ֆորումի անցկացման հիմնական գաղափարն այն է, որ մասնակից երկրները միմյանցից սովորեն եւ հանդիպումների ընթացքում ներկայացնեն իրենց լավագույն փորձը»-ասաց Արլեն Միտչելը:

Սիրիայում ՄԱԿ-ի Պարենի համաշխարհային ծրագրի ներկայացուցիչ Յասեր Ալիի խոսքով' ֆորումը հնարավորություն կտա բարելավումներ կատարել Սիրիայի դպրոցների սնուցման ծրագրում' օգտագործելով նաեւ այլ երկրների փորձը:

«Մենք այժմ պայմանագրեր ենք կնքում տեղական արտադրողների հետ' խրախուսելով տեղական արտադրանքի տարածումը դպրոցներում»-նշեց ֆորումի մասնակից Յասեր Ալին: