Հովիկ Աբրահամյանը պատրաստվում է ակտիվորեն մասնակցել գալիք խորհրդարանական ընտրություններին. ՀՀ Նախագահ

ՀՀ Նախագահ, Հանրապետական կուսակցության առաջնորդ Սերժ Սարգսյանը ՀՀԿ խորհրդի նիստում շնորհակալություն է հայտնել Հովիկ Աբրա­համյանին՝ այս պատասխանատու ժամանակահատվածում Հայաս­տանի կա­ռավարությունը ղեկավարելու համար:

«Նոր քաղա­քական մշակույ­թի հա­մար առանցքային է պաշտո­նատար անձի կողմից պաշտոնից չկառչելու առաքի­նությունը, եթե այդ պաշտոնում դու արել ես առավելագույնը: Ես բարձր եմ գնահատում վարչապետ Հովիկ Աբրա­համյանի քայլը, ում գլխավորությամբ կառա­վարությունը վերջին երկու տարիների ընթացքում կարողացավ ապահովել տնտեսական կայունություն, զերծ պահել երկիրն արտաքին աշխարհից եկող բա­ցասականազդեցությունների հնարավոր հետևանք հանդի­սացող ցնցումներից, իրականացվող քաղաքա­կանու­թյան արդյուն­քում ապահովել տնտեսական այնպիսի «ցուցանիշներ, որոնք շատ երկրներ ուրախ կլինեին ունենալ, սակայն չբավարարվելով դրանցով և մշտա­պես արձանագրելով, որ Հայաս­տա­նին անհրա­ժեշտ է ավելի բարձր և կայուն, եր­կա­րաժամկետ աճ: Վար­չապետ Աբրահամյանը փորձեց պարզ մարդկային լեզվով խոսել իր քաղաքացիների հետ, լսեց մարդկանց ու լսված եղավ նրանց կողմից»,- տեղեկացրին ՀՀԿ լրատվական ծառայությունից, ասել է Սերժ Սարգսյանը՝ ավելացնելով, որ կառա­վարությունն արել է հնարավորը երկիրը փո­փոխու­թյունների նոր փուլ տան ելը նախապատրաստելու համար, ինչը հսկայական աշխատանք էր, և դա արել է հաջողությամբ:

«Շատ-շատ շնոր­հակալ եմ, պարոն Աբրահամյան: Ասեմ, որ Հովիկ Աբրահամյանը պատրաստվում է ակտիվորեն մաս­նակ­­ցել գալիք խորհրդարանական ընտրություններին, այնպես որ մեր հա­մատեղ աշխա­տանքը շարունակվելու է, անշուշտ»,- նշել է Սերժ Սարգսյանը:

Միևնույն ժամանակ, ՀՀ Նախագահը շնորհավորել է Կարեն Կարապետյանին Հայաստանի Հանրապետության կառա­վարության ղեկն ստանձնելու կապակցությամբ և ավելացրել, որ վճռորոշ փուլ են մտնում, մեծ է պատասխանատվությունն ու էական են ակնկալիքները: «Վստահ եմ, որ բոլորս անվերապահորեն սատարելու ենք նրա նախաձեռնությունները: Շնորհավորում եմ և հաջողություն եմ մաղթում մեզ բոլորիս»,- ասել է Սերժ Սարգսյանը: