Մի քանի ընտանիք գրեթե ամբողջ երկիրը, գրեթե բոլոր ոլորտները կիսել են իրար մեջ, մնացածը զգում են իրենց «իզգոյի» կարգավիճակում

Հարցազրույց «Հանուն կայուն մարդկային զարգացման» ասոցիացիայի/ UNEP ազգային կոմիտեի նախագահ, աշխարհագրական գիտությունների դոկտոր, կենսաբանական գիտությունների թեկնածու, Միջազգային էկոլոգիական ակադեմիայի իսկական անդամ Կարինե Դանիելյանի հետ:

- Վարչապետի և կառավարության հրաժարականները ձեզ համար անակնկա՞լ էին:

- Այնքան էլ անակնկալ չէին, որովհետև «Սասնա ծռեր» զինված խմբավորման կողմից ոստիկանության ՊՊԾ գնդի տարածքի և շինությունների գրավման առնչությամբ հանրապետության նախագահը հրավիրել էր տարբեր ոլորտների ներկայացուցիչների, նաև՝ Հանրային խորհրդի անդամներին, և այդ հանդիպման ժամանակ նախագահը ասաց, որ լինելու են արմատական փոփոխություններ, և իրենք ձևավորելու են ազգային համաձայնության կառավարություն: Այնպես որ, դա սպասելի էր:

Ես և՛ Հանրային խորհրդում, և՛ այլուր ասել եմ, որ «Սասնա ծռեր»-ի այդ գործողությունը և դրան հաջորդած իրադարձությունները պատահականություն չէին, այլ օրինաչափություն, որովհետև երկրում շատ սխալ երևույթներ և իրողություններ կան: Եթե այսպիսի արտագաղթով երկրի բնակչությունը մի օր կարող է կիսվել, եթե մարդիկ գնում են ու լավ կյանքից չեն գնում, ուրեմն կառավարման մեջ մենք որքա՜ն թերություններ ունենք, արմատական թերություններ, որ մարդկանց մի մասը, հույսն արդեն կորցրած, թողնում, գնում է, իսկ ուրիշներն էլ՝ ռադիկալ կողմնորոշմամբ, զենքն առան, ընկան քաղաքի մեջտեղում այդ կռիվը սկսեցին: Այնպես որ, արմատական փոփոխությունների անհրաժեշտությունը հասունացած է: Ես շատ եմ ցավում, բայց մենք կառուցել ենք կիսաֆեոդալական պետություն, ժամանակակից պետություն չէ: Մի քանի ընտանիք գրեթե ամբողջ երկիրը, գրեթե բոլոր ոլորտները կիսել են իրար մեջ, մնացածը զգում են իրենց «իզգոյի» կարգավիճակում, դրանից է գալիս այս ամբողջ դժգոհությունը:

- Երկրում առկա բնապահպանական բազմաթիվ հիմնախնդիրների լուծման առումով ի՞նչ սպասումներ ունեք նոր վարչապետից:

- Երբ նա Երևանի քաղաքապետն էր, ես նրա մի հանդիպմանը մասնակցել եմ և հարցեր եմ տվել, սակայն նրա կողմից առանձնապես բնապաշտական մոտեցում չեմ տեսել: Այնուամենայնիվ, եթե նա ժամանակակից մարդ է, ի վերջո, Ռուսաստանում է ապրել, շփվել է և աշխատել, ապա պետք է, որ իմանա, թե այսօր որքան սրված են էկոլոգիական հիմնախնդիրները, այդ մոտեցումները, միջազգային ասպարեզում այն հասկացությունը կա, որ դրանք այսօր ամենակարևոր խնդիրներից են, որովհետև, պարզվում է, մոլորակը մարդկությանն արդեն ուղղակի դուրս է մղում որպես խանգարող մի տեսակ: Ես հույս ունեմ, որ, համենայն դեպս, նոր վարչապետն այս առումով արդիական մոտեցումներ կդրսևորի, բայց, միաժամանակ, ինձ մի փոքր անհանգստացնում է այն, որ ամեն ինչ նորից զրոյից չսկսվի, ինչպես դա եղավ Տիգրան Սարգսյանից հետո, երբ վարչապետ նշանակվեց Հովիկ Աբրահամյանը:

Հարցազրույցը՝ Արթուր Հովհաննիսյանի