Պարտադիր չէ, որ կեղծ խմիչքներից բազմաթիվ մարդիկ մահանան, 100 շիշ «IMPERSKAYA» օղու կեղծումն էլ միակ դեպքը չէ

Քանի որ ՀՀ գյուղատնտեսության նախարարության Սննդամթերքի անվտանգության պետական ծառայության ղեկավարության գործելակերպում որոշիչը վախկոտությունը կամ կոռուպցիան է, ինչով էլ հաճախ պայմանավորված է պաշտոնական հարթությունում այս ծառայության արդեն խրոնիկ բնույթ ունեցող անգործությունը, մեր հալն էլ պետք է սա լինի…

Մի շատ պարզ հարց' որևէ մեկը մեր օրերում կհանդգնե՞ր իրացման նպատակով կեղծ օղի պատրաստել (միգուցե սննդում օգտագործելու համար չթույլատրված էժանագին, թունավոր կամ եթերային յուղերի անթույլատրելի պարունակությամբ սպիրտից, այս մասին հասարակությունը պաշտոնապես դեռ տեղեկացված չէ) և իրացնել, եթե Սննդամթերքի անվտանգության պետական ծառայությունն իր դերում լիներ:

Նախապես ընդգծեմ, որ ստորև ներկայացվողն այդպիսի միակ դեպքը չէ: Քրեական գործի նախաքննությամբ պարզվել է, որ 1987 թ. ծնված Արթուր Առաքելյանը 2015թ. ապրիլից օգոստոս ժամանակահատվածում իր բնակարանում իրացման նպատակով պատրաստել է «Ավշար» ընկերության ապրանքանիշով շուրջ 100 շիշ «IMPERSKAYA» անվամբ կեղծ օղիներ, որոնք նույն ժամանակահատվածում համապատասխանաբար 300, 700 և 900 դրամով իրացրել է Քաջարան քաղաքի բնակիչ Կարապետ Թոսունյանին: Ա. Առաքելյանն այս տարվա փետրվարի 13-ից ոստիկանության Կապանի բաժնի կողմից հետախուզվում էր ՀՀ քրեական օրենսգրքի 207 հոդվածի 1-ին մասի մեղադրանքով: Հետախուզում հայտարարելուց 3 օր հետո ոստիկանության Արարատի բաժանմունքի ծառայողների ձեռնարկած միջոցառումների շնորհիվ, նա հայտնաբերվել է Երևանի հիվանդանոցներից մեկի հարակից տարածքում և բերման ենթարկվել:

Նույն քր. գործի շրջանակում մեղադրանք է առաջադրվել նաև Կարապետ Թոսունյանին այն բանի համար, որ նա կեղծ օղիներ իրացնելու և շահույթ ստանալու նպատակով, 2015թ. ապրիլից օգոստոս ժամանակահատվածում Ա. Առաքելյանից ձեռք է բերել վերջինիս պատրաստած 100 շիշ կեղծ օղին, որից 90 նույն ժամանակահատվածում իրացրել է Քաջարանում:

Դե, իհարկե, վերը նշված արարքների համար Արթուր Առաքելյանին և Կարապետ Թոսունյանին մեղադրանք առաջադրվել է ՀՀ քրեական օրենսգրքի 207-րդ հոդվածի («Կեղծ գինի կամ կեղծ օղի կամ ալկոհոլային կեղծ այլ խմիչք իրացման նպատակով պատրաստելը կամ իրացնելը») 1-ին մասի հատկանիշով, Արթուր Առաքելյանի նկատմամբ որպես խափանման միջոց ընտրվել է կալանքը, սակայն խնդիրը սոսկ այն չէ, որ նրանց քրեական պատասխանատվության հարցը չէ:

Պակաս կարևոր չէ այն հարցը, թե Սննդամթերքի անվտանգության պետական ծառայությանը վերջին 5 տարում ոչ միայն կեղծ օղիների, այլև կեղծ կոնյակների և գինիների իրացման քանի՞ դեպք է հայտնաբերել, յուրաքանչյուր դեպքում քանի՞ շիշ են եղել դրանք, որտե՞ղ, ե՞րբ և ո՞ւմ կողմից են իրացվել այդ ալկոհոլային կեղծ խմիչքները: Բնավ չենք զարմանա, եթե պարզվի, որ վաղուց իր ղեկավար կազմի (և ոչ միայն…) արմատական փոփոխության կարիք ունեցող հիշյալ ծառայության կողմից կեղծ ալկոհոլային խմիչքների հայտնաբերման ցուցանիշը գրեթե զրո լինի կամ շատ փոքր, մինչդեռ Հայաստանում նույնպես արտադրվում են կեղծ ալկոհոլային խմիչքներ, այդպիսի դեպքեր հայտնաբերվել են ոստիկանության և ՊԵԿ-ի կողմից, եթե նույնիսկ այդ հայտնաբերումները չլինեին էլ, ալկոհոլային կեղծ խմիչքների արտադրության շարունակման մասին հուշում է այն փաստը, որ ինչ-որ անձինք գնում են օգտագործված խմիչքների այնպիսի շշեր, որոնք դրանց օրինական արտադրողի կողմից երկրորդ անգամ չեն օգտագործվում:

Ահա ոչ վաղ անցյալի ևս մեկ դեպք. 2013թ. հուլիսի 31-ին ոստիկանության Մուշի բաժնում օպերատիվ տվյալներ են ստացվել, որ Գյումրիի բնակչուհի, 1982 թ. ծնված Նաիրա Ա.-ն իրացնում է կեղծ ալկոհոլային խմիչքներ:

Փաստը ստուգելու կապակցությամբ նույն օրը, ժամը 23:55-ին, ոստիկանության ծառայողները եղել են օպերատիվ տվյալներով իրենց արդեն հայտնի հասցեում, որտեղ Նաիրա Ա.-ն իր կացարանում ներկայացրել է 6 շիշ 0,5 լ տարողությամբ «Արմյանսկայա կրեպոստ» տեսակի կոնյակ, 15 շիշ 0,5 լ տարողությամբ «Տալկա» տեսակի օղի:

Նաիրա Ա.-ն հայտարարել է, որ նշված խմիչքները վերավաճառելու համար իրեն տվել է 1972 թ. ծնված Անահիտ Կ.-ն, ինչպես նաև ոմն Արա:

Թե որքան վտանգավոր է վերոնշյալ հանցատեսակը, կարծում եմ, հասկանալի է բոլորին: Պարզապես հիշեցնեմ, որ անցյալ տարի Ստամբուլում կեղծ ոգելից խմիչքներ գործածելու պատճառով տատասնյակ մարդիկ որովայնում ցավերի և տեսողության կորստի բողոքներով դիմել էին հիվանդանոցներ, նրանցից 9-ի կյանքը փրկել չէր հաջողվել: Պարտադիր չէ, որ Երևանում էլ, որտեղ նախորդ տարիներին կեղծ ալկոհոլային խմիչքներից թունավորման դեպքեր գրանցվել են, հերթական դեպքն ուղեկցվի բազմաթիվ զոհերով, որպեսզի Սննդամթերքի անվտանգության պետական ծառայությունն այս առումով գործի կամ ակտիվացնի իր գործունեությունը:

Արթուր Հովհաննիսյան