«Ազգային ժողովը շոուներ անելու վայր չէ». Շարմազանովը՝ Փաշինյանին

Ես կարծում եմ՝ նախևառաջ Ազգային ժողովում պետք է խոսեն ըստ էության և վարման կարգի վերաբերյալ, սակայն ԱԺ պատգամավոր Նիկոլ Փաշինյանի բարձրացրած հարցը օրակարագի հետ որևէ կապ չուներ: Աժ-ում լրագրողների հետ զրույցում այսպես արձագանքեց ԱԺ փոխխոսնակ Էդուարդ Շարմազանովը՝ անդրադառնալով Նիկոլ Փաշինյանի հայտարարությանը, որտեղ վերջինս Մոսկվայում սպանված հայազգի երկու քաղաքացիների սպանության համար ակնարկեց ԱԺ պատգամավոր Սամվել Ալեքսանյանին:

Հիշեցնենք, որ Նիկոլ Փաշինյանն այսօր ԱԺ-ում հայտարարեց, թե սպանության հետքերը բերում են ՀՀ Ազգային ժողով:
Շարմազանովը նախ շեշտեց, որ եթե պատգամավորները այսօր խնդիր ունեն երևալու, ապա դա չի նշանակում, որ ով ինչ ուզի, կարող է ասել կամ հայտարարել:

«Պատմությունը ցույց է տվել, որ ով ամեն ինչից խոսում է, պետք է նաև ամեն ինչ իր տեղում լինի»,- նկատեց պատգամավորը:

Դիտարկմանը՝ Նիկոլ Փաշինյանը, փաստորեն, ակնարկում է, որ Ազգային ժողովում նստած է մարդասպան, կամ՝ Ազգային ժողովը ինքը մարդասպանության օջախ է, Շարմազանվը չհամաձայնեց, նշելով՝ եթե կա խնդիր, ապա դրանով պետք է զբաղվեն իրավապահները: «Ազգային ժողովը շոուներ անելու վայր չէ: Եթե կա այդպիսի խնդիր, ապա իրավապահները կզբաղվեն, իսկ ով ինչ կարդա, վարման կարգով խոսի, կարծում եմ, որ որևէ մեկի, այդ թվում՝ Ձեր մատնանշած պատգամավորի շահերից չի բխում, քանի որ շատերի մասին շատ բան կարող են գրել: Այդ մասին խոսելու համար սա այն տեղը չէ, իսկ ես ոչ հաստատողն եմ, ոչ՝ փաստաբանը, ոչ էլ, առավել ևս, հերքողը: Մենք ապրում ենք ժողովրդավարական երկրում, որտեղ կա իշխանությունների տարանջատման սկզբունք: Մինչև Ձեր նշած պատգամավորի հայտարարությունը, մամուլն արդեն այդ մասին գրել էր, իսկ ցանկացած հրապարակման իրավապահ մարմիններն ուշադրությամբ հետևում են»:

Դիտարկմանն՝ իրավապահները պետք է զբաղվեն նաև Նիկոլ Փաշինյանո՞վ, Էդուարդ Շարմազանովը հավելեց, որ իրավապահ մարմինները շատ լավ տիրապետում են իրենց աշխատանքին ու պարտականություններին: «Ես չէ, որ պետք է ասեմ՝ նրանք ինչ անեն, ինչը՝ ոչ»:

Իսկ թե ՀՀԿ խմբակցությունն ինչպես է վերաբերվում, որ իր խմբակցության անդամի անունը կապվում է նման աղմկահարույց սպանության հետ, պատգամավորը պատասխանեց, որ քաղաքականությունն այն հարթակն է, որտեղ ամեն ինչ էլ կարող է պատահել: «Կարող են հնչել նաև տարբեր մեղադրանքներ, ինչը նոր երևույթ չէ: Իսկ առհասարակ՝ ժողովրդավարության մեջ գործում է նաև անմեղության կանխավարկածը»,- եզրափակեց նա: