«Նաստրոյկաների՞», թե՞ անսարքության խնդիր. ինչո՞ւ չեն աշխատում թվային հեռարձակման ընդունիչ սարքերը

Հոկտեմբերի 28-ի Հայաստանն անցավ թվային հեռարձակման ռեժիմի, որով հայ հասարակության՝ առանց այդ էլ հոգսաշատ խնդիրներին ավելացավ ևս մեկը՝ մարդկանց մեծ մասը զրկվեց հեռուստացույց դիտելու հնարավորությունից: Թեև տրանսպորտի և կապի նախարարությունը վստահեցնում է, որ սոցիալապես անապահով ընտանիքները ստացել են թվային ընդունիչ սարքավորումներ, բայց այսօր մեծ թվով մարդիկ ահազանգում են, որ այդ սարքերի մեծ մասը չի աշխատում, կամ շուտ է շարքից դուրս գալիս: Փաստորեն, ստացվում է, որ դրանք նախատեված են միանգամյա օգտագործման համար:

ՀՀ կապի և տրանսպորտի նորանշանակ նախարար Վահան Մարտիրոսյանը, սակայն, չհամաձայնեց այս տեսակետի հետ, վստահեցնելով, որ սոցիալապես անապահով ընտանիքներն ապահովված են եղել ընդունիչ սարքավորումներով, իսկ այն խնդիրները, որոնց մասին բարձրաձայվում է, այսօր էլ շարունակում են նախարարության ուշադրության կենտրոնում մնալ: Ավելին՝ նախարարը հավաստիացրեց, որ ինքն անձամբ է հետևում թեժ գծի ահազանգերին: Ինչ վերաբերում է սարքերի անսարքությանն, ապա նա տեղեկացրեց, որ դրանք ոչ թե չեն աշխատում, այլ խնդիրը կապված է կարգավորումների հետ:

«Նախարարությունը սոցիալապես անապահով մարդկանց՝ բոլորին, ապահովել է դեկոդերներով: Մեկ տարուց ավել հայտարարվում էր, որ պետք է անալոգային հեռարձակումն անջատվի, սակայն կան մարդիկ, ովքեր դեռևս ձեռք չեն բերել այդ սարքը: Այն դեկորդերները, որոնք բաժանվել են, դրանք երաշխիքով են, բոլորն էլ այդ ժամկետի մեջ են, և որոնք, որ տրամադրվել է նախարարության կողմից, դրանք կարող են ցանկացած ժամանակ փոխել նորի հետ, իսկ մասնավորի կողմից գնվածին ոչ մի երաշխիք տալ չենք կարող»,- ԼՈՒՐԵՐ.com-ի հարցին ի պատասխան՝ ասաց նախարարը:

Մեր դիտարկմանը՝ մասնավորից ձեռք բերված թվային սարքավորումների մեծ մասը հիմնականում անսարք է, ու դրանք չեն աշխատում, նախարարը նախ նշեց, որ գործում է թեժ գիծ, որին կարող են ահազանգել, ապա հավելեց.

«Այն ահազանգերը, որոնք եղել են մինչ օրս թեժ գծին, դրանց մեծ մասը կապված է ընդունիչ սարքի նաստրոյակների հետ: Շատ են այն ահազանգերը, որոնք կապված են կարգավորումների հետ: Մարդիկ ուղղակի չեն կարողացել ճիշտ միացնել: Դրանց մեծ մասը եղել է նաև մասնավորից ձեռք բերված: Մեր կողմից արվում է ամեն ինչ, որպեսզի այդ հարցը ևս կարգավորվի,- վստահեցրեց նախարարը: