Նոր մանրամասներ՝ Hummer-ի մասնակցությամբ տեղի ունեցած ողբերգական ավտովթարից (լուսանկարներ)

Պարզվել է՝ այսօր՝ սեպտեմբերի 5-ին, Երևանում՝ Աճառյան փողոցում, Ֆորդ «Ֆորա» ՍՊԸ-ի դիմաց տեղի ունեցած դաժան ու ողբերգական ավտովթարի հետևանքով մահացած երեխայի, վարորդների և վիրավորների ինքնությունը: Ինչպես հայտնում է ֆոտոլրագրող Գագիկ Շամշյանը, պարզվել է՝ Opel մակնիշի ավտոմեքենան վարել է Արարատի մարզի Ոստան գյուղի բնակիչ, 36-ամյա Կարեն Մկրտչյանը, Hummer մակնիշի ավտոմեքենան վարել է Երևան քաղաքի Բաղրամյան 4-րդ նրբանցքի բնակիչ, 23-ամյա Արթուր Հակոբյանը, իսկ Nissan մակնիշի ավտոմեքենան վարել է Երևան քաղաքի Սարյան փողոցի բնակիչ, 40-ամյա Արմեն Ասրյանը:

Վթարի հետևանքով Opel-ի ուղևոր, Արարատի մարզի Ոստան գյուղի բնակիչ, 11-ամյա Լարիսա Մկրտչյանը տեղում մահացել է, իսկ մյուս ուղևորներ՝ նույն գյուղի բնակիչ, 34-ամյա Քնարիկ Սարգսյանը, 31-ամյա Ասյա Մուրադյանը և Opel-ի վարորդ Կ. Մկրտչյանը մարմնական վնասվածքներով տեղափոխվել են Սուրբ Գրիգոր Լուսավորիչ բժշկական կենտրոն:

Աղբյուրի տեղեկություններով՝ քննիչներն ու ոստիկանները ունեն նաև օպերատիվ տվյալներ, որ մեկ այլ ավտոմեքենա, խախտելով ճանապարհային երթևեկության կանոնները, ստեղծել է վթարային իրավիճակ և Hummer-ի վարորդը, հավանաբար, արագ ընթանալով, փորձել է խուսափել, որպեսզի չբախվի ճանապարհի մեջտեցի չթույլատրելի հատվածում հայտնված սպիտակ գույնի ավտոմեքենային՝ դուրս է եկել հանդիպակաց գոտի և բախվել Opel-ին, ինչն էլ դարձել է խոշոր ու ողբերգական ավտովթարի պատճառ:

Ինչպես ավելի վաղ հայտնել ենք՝ սեպտեմբերի 5-ին, խոշոր ու ողբերգական ավտովթար էր տեղի ունեցել Երևանում։ Ժամը 13։00-ի սահմաններում Աճառյան փողոցում՝ Ֆորդ «Ֆորա» ՍՊԸ-ի դիմաց, բախվել էին Opel մակնիշի 32 ՕԼ 127 համարանիշի, Hummer մակնիշի 07 XX 078 համարանիշի և Nissan մակնիշի 34 NN 210 համարանիշի ավտոմեքենաները։ Վթարի հետևանքով 1 հոգի, ով 11 տարեկան աղջիկ էր, տեղում մահացել է, ում գլուխը մարմնից կտրվել էր, իսկ 2 հոգի էլ տեղափոխվել էին «Սուրբ Գրիգոր Լուսավորիչ» բժշկական կենտրոն։

Մանրամասները՝ Shamshyan.com կայքում