Հեռուստատեսությունը նպաստում է հանցագործությունների թվի աճին. Վահրամ Միրաքյան

Այն, որ հեռուստատեսային ագրեսիան հանգեցնում է հանցագործությունենրի աճին, ապացուցված է: Այսօր լրագրողների հետ հանդիպմանն այս մասին ասաց «Հեռուստաեթերի մաքրման պահանջ» հասարակական նախաձեռնության անդամ Վահրամ Միրաքյանը:

«Ըստ Ազգային վիճակագրական ծառայության՝ 2005 թվականին 8,000 հանցագործություն էր գրանցվել, մինչդեռ 2010-ին դրանց թիվը հասել է 15,000, այսինքն՝ կրկնապատկվել է: Հարց է առաջանում՝ ինչո՞ւ նախկինում այդ թիվը չէր աճում՝ չնայած եթերում կրկին ագրեսիա կար»,- ասաց Միրաքյանը՝ դա բացատրելով նրանով, որ տեղական արտադրության սերիալների նույնականացումն ավելի արագ է ընթանում:

Նրա խոսքով՝ եթերը կարգավորելու համար ստեղծված կառույցները՝ մասնավորապես Հեռուստատեսության և ռադիոյի ազգային հանձնաժողովը, ձևական կառույց է ու գործառույթներ չունի, քանի որ օրենսդրական դաշտում բացթողումներ կան:

Այս նախաձեռնությանը միացած ռազմական փորձագետ Դավիթ Ջամալյանն էլ նշեց, որ այս խնդիրը ամենահրատապներից է, քանի որ հեռուստատեսությունը հանդես է գալիս անձ ձևավորող գործոն՝ սոցիալականցնող:

«Մեր ընկալումներում բազմաթիվ ազատություններ ընկալվում են իբրև անսահմանափակ, բացարձակ, մինչդեռ այդպես չէ: Պետք է ապահովել եթեր, որը չի դեգրադացնի հասարակությունը, այլ կնպաստի բարոյական աճին»,- նշեց նա:

Նրա խոսքով՝ մշակութային քաղաքականություն պետք է վարել, պետք է լինեն խրախուսանքներ և պատիժ, պետությունը պետք է պատվեր իջեցնի, խրախուսի, մրցույթներ անցկացնի, ֆինանսավորի ծրագրեր ոչ միայն հանրային հեռուստաընկերությունում: