Ահազանգ. Նոր Նորքի բնակիչները բողոքում են անկանոն տրանսպորտից ու աղբահանությունից

ԼՈւՐԵՐ.com ահազանգած Նոր Նորքի բնակիչները բողոքում են 2-րդ զանգվածի աղբահանությունից ու տրանսպորտից: 

«Արդեն մի քանի ամիս է՝ աղբահանությունը կաթվածահար վիճակում է: Աղբամանները անմխիթար են, աղբի հոտը հեռվից զգացվում է: Աղբը արդեն փակել է հետիոտների համար նախատեսված մայթերը»,- նշում է քաղաքացին:

Բնակիչը դժգոհում է նաև տրանսպորտպային միջոցների սակավությունից ու անկանոն գրաֆիկից, ինչն ավելորդ  անհարմարություններ է ստեղծում իրենց համար. «38 համարի ավտոբուսը ահավոր վատ է գործում, անկանոն գրաֆիկով, ինտերվալը տարբեր ժամերի տարբեր է, հիմնականում 40-50 րոպեն մեկ, մինչև ժամը 18-19-ն են աշխատում: Իսկ շաբաթ և կիրակի գրեթե չեն գործում: Շաբաթ օրը ընդամենը 1 հատ է աշխատում. պետք է գնա հասնի Նորագավիթ, հետ գա, իսկ դրա համար առնվազն 2 ժամ է պետք է: Գոնե աշխատանքային օրերին կանոնավոր գործի»,- ասաց ահազանգած քաղաքացին:

Քաղաքացին պահանջում է դեպի կենտրոն գնացող նոր երթուղի բացել կամ այլ կերպ հարցը կարգավորել:

«38 ավտոբուսն ու 55 միկրոավտոբուսն են գործում կենտրոն գնացող: 38-ին էլ չենք սպասում, իսկ 55 համարից երեկոյան միայն մեկն է աշխատում, 45-50 րոպե ինտերվալով: Մետրոպոլիտենի Երիտասարդական կայարանի հարևանությամբ է վերջին կանգառը: Մոտ 70 հոգի սպասում է նույն տրանսպորտին. երբ գալիս է՝ 20 հոգի մոտավորապես տեղավորվում են, իսկ մնացածը մնում են՝ 2 տրանսպորտ փոխելով կամ տաքսիով: Դարձրել են մի քանի ավտոբուս, որը շատ քիչ է: Իսկ կենտրոն գնացող ուսանողությունն ու աշխատողները ամեն օր ոտքով պետք է գնան Գայի պողոտա, կամ մի քանի տրանսպորտ փոխելով»,- նշեց մտահոգ քաղաքացին:

Նշենք, որ 38 համարի ավտոբուսի երթուղին սկսում է Գ. Այնթափից, այնուհետև՝ Արտաշատի խճ. - գ. - Նորագավթի 1-ին փող. - Արշակունյաց - Բագրատունյաց պող-ներ - Գարեգին Նժդեհի հրապ. - Գարեգին Նժդեհի փող. - Արշակունյաց պող. - Ագաթանգեղոսի - Աղասի Խանջյանի փող-ներ - Սայաթ-Նովայի պող. - Եղիշե Չարենցի - Կորյունի - Խաչատուր Աբովյանի փող-ներ - Աբովյան պուրակ - Ալեքսանդր Մյասնիկյանի - Գայի պող-ներ - Նելսոն Ստեփանյանի - Մոլդովական փող-ներ - Նոր Նորքի 2-րդ զ-ծ (վերջ. կ.):